Azərbaycan Milli Konservatoriyasına yeni rektor təyin edilib.
İnsanoid.com xəbər verir ki, Azərbaycan Respublikası Prezidenti İlham Əliyevin imzaladığı Sərəncamla professor, sənətşünaslıq üzrə fəlsəfə doktoru Kamilə Dadaşzadə Azərbaycan Milli Konservatoriyasının rektoru vəzifəsinə təyin edilib.
Kamilə Dadaşzadə professor, sənətşünaslıq üzrə fəlsəfə doktorudur və uzun illər Musiqi Tarixi və Nəzəriyyəsi kafedrasının müdiri olaraq fəaliyyət göstərib.
Əməkdar incəsənət xadimi olan Dadaşzadə Azərbaycan musiqi elminin inkişafına böyük töhfələr verib. Azərbaycan xalq musiqisinin, xüsusilə aşıq sənətinin tədqiqi və təbliği ilə bağlı çoxsaylı araşdırmalar aparıb. 2000-ci ildə “Azərbaycan aşıqlarının dastan havalarında semiotik prinsiplərin təhlilinə dair” mövzusunda dissertasiya müdafiə edərək, musiqi tədqiqatlarında yeni metodoloji yanaşmalar tətbiq edib. “Dastanın işarə sistemi” və “Üzeyir Hacıbəyli və aşıq sənəti: intertekstual dialoq” adlı əsərlərin müəllifidir.
Azərbaycan musiqi elminin və təhsilinin inkişafında əhəmiyyətli yer tutan Kamilə Dadaşzadənin rektor olaraq yeni vəzifəsində də uğurlu fəaliyyət göstərəcəyi gözlənilir.
