Əmək pensiyaçılarının sayını nəzərə alsaq, indeksləşdirmə nəticəsində 1 milyon 100 min vətəndaşımızın gələn ildən pensiya məbləğlərində artım qeydə alınacaq.
Milli.az xəbər verir ki, bunu Milli Məclisin deputatı Vüqar Bayramov parlamentin bu gün keçirilən plenar iclasında çıxışı zamanı deyib.
O qeyd edib ki, 2024-cü ildə əmək pensiyaları üçün 6 milyard 525 milyon manat manat nəzərdə tutulub.
"Deməli, indeksləşdirmə kifayət qədər böyük pensiya fondu üzərindən aparılacaq və bu da sosial təminat siyasətinin səmərəlliyini göstərir. Eyni zamanda, əmək pensiyaçılarının sayını nəzərə alsaq, indeksləşdirmə nəticəsində 1 milyon 100 min vətəndaşımızın gələn ildən pensiya məbləğlərində artım qeydə alınacaq.
Sosial mediada suallar verilir, nə üçün orta aylıq əməkhaqqındakı artım faizinə uyğunlaşdıraraq indeksləşdirilir. Əvəlla, son 5 ilə nəzərə salsaq, nominal orta aylıq əməkhaqqındakı artım faizi həmin müddət üzrə orta inflyasiya səviyyəsini üstələyib. Deməli, əməkhaqqı artımına bağlılıq vətəndaşlarımızın pensiya məbləğinin daha çox artmasına imkan yaradır. Digər tərəfdən, DSMF-in büdcəsi əsasən məcburi sosial sığorta yığımları hesabına formalaşır. Sosial sığorta yığımları həcmi isə ölkə üzrə ümumi əməkhaqqı fondunun məbləğinə bağlı dəyişir. Yəni, bu o deməkdir ki, əməkhaqqı fondu nə qədər çox artırsa, sosial ayırmalar o qədər artır. Bu həmçinin o deməkdir ki, əmək pensiyalarının indeksləşdirilməsinin orta aylıq əməkhaqqındakı artıma indeksləşdirilməsi bir tərəfdən vətəndaşlarımız üçün daha çox pensiya artımı demək olmaqla yanaşı, həmçinin DSMF-in dayanıqlığının qorunub saxlanmasına imkan yaradır. Yəni, fond əməkhaqqı fondundakı artımlar hesabına əldə edilən yığımlar hesabına pensiyaları indeksləşdirərək fiskal dayanıqlığını qoruyub saxlayır",- o deyib.
