Baş Prokurorluğun İstintaq İdarəsinin xüsusilə mühüm işlər üzrə böyük müstəntiqi Teymur Qarayev Baş prokurorun xüsusi tapşırıqlar üzrə böyük köməkçisi vəzifəsinə təyin edilib.
Baş Prokurorluğun Mətbuat Xidmətindən İnsanoid.com-a verilən məlumata əsasən, bu barədə Baş prokuror Kamran Əliyev əmr imzalayıb. Teymur Qarayev 2013-cü ildə müsabiqə yolu ilə prokurorluq orqanlarında qulluğa qəbul olunub. O, əvvəlcə Xətai rayon prokurorluğunun müstəntiqi, daha sonra Bakı şəhər prokurorluğunun İstintaq İdarəsinin böyük müstəntiqi vəzifələrində çalışıb. Qarayev həmçinin bir sıra ictimai rezonans doğuran ağır cinayət işlərinin ibtidai istintaqını aparıb.
Baş prokurorun digər əmrinə əsasən, Baş prokuror yanında Korrupsiyaya qarşı Mübarizə Baş İdarəsinin İstintaq İdarəsinin mühüm işlər üzrə müstəntiqi Tuqay Rəhimli Baş prokurorun xüsusi tapşırıqlar üzrə köməkçisi vəzifəsinə təyin edilib.
Tuqay Rəhimli 2019-cu ildə müsabiqə yolu ilə prokurorluq orqanlarında qulluğa qəbul olunub. O, əvvəllər Gəncə şəhər və Binəqədi rayon prokurorluqlarında müstəntiq vəzifələrində işləyib. Rəhimli həmçinin London Universitet Kollecində (UCL) magistr təhsili alıb və 2 ildən artıq müddətdə Avropa İnsan Hüquqları Məhkəməsində çalışıb.
[gallery size="full" ids="213385,213386"]
