Azərbaycanın bir çox yeniyetmə idmançısı var. Onlar müxtəlif beynəlxalq yarışlarda iştirak edərək ölkəmizin bayrağını ucaldırlar, əzmkarlıq, zəhmət və istedadla çalışaraq həm ölkə daxilində, həm də beynəlxalq arenada daha böyük uğurlar qazanmağa çalışırlar. Azərbaycanda populyarlaşan idman növlərindən biri də gimnastikadır.
Gencexeber.az-ın əməkdaşı şəhid Eltay Quliyevin qızı, Milli Gimnastika Arenasında keçirilən “Qış möcüzəsi” adlı beynəlxalq gimnastika yarışında 1-ci yer qazanan Gülnur Əşrəfli ilə həmsöhbət olub.
Müsahibəni təqdim edirik:
– Gülnur, öncə özün haqqında məlumat verməyini istərdim.
– Cəlal Paşayev adına 39 saylı tam orta məktəbin 5-ci sinfində təhsil alıram. 11 yaşım var. Gəncədə yaşayıram.
– “Qış nağılı” beynəlxalq gimnastika yarışında 1 ci yer qazanmısan, bu haqda danışmağını istərdim.
– “Pro Sport”un təşkil etdiyi “Qış möcüzəsi” 8-ci ritmik gimnastika yarışında iştirak etdim. “2014 C Light” kateqoriyası üzrə 1-ci yerə layiq görüldüm. Bu birinciliyim ailəmə yeni il hədiyyəsi oldu. Əlavə olaraq “Will to win” nominasiyasına da layiq görüldüm.
– Necə oldu ki, bu idman növü ilə məşğul olmaq qərarına gəldin? Neçə ildir məşğulsan?
– Uşaq vaxtı çox aktiv olmuşam və valideynlərim hər zaman “səni gimnastikaya qoyacağıq” deyiblər. Atam şəhid olduqdan sonra hər bir vətənpərvər kimi Yeganə müəllimə də ziyarətə gəlmişdi. Anamla söhbət əsnasında aydın oldu ki, Yeganə xanım uşaqlara gimnastika dərsi keçir və yarışlara aparır. Elə o vaxtdan artıq 4 ildir ki, gimnastika ilə məşğul oluram. Dəfələrlə yerli və beynəlxalq yarışlarda iştirak etmişəm.
– Ailədə səndən başqa idmanla məşğul olan varmı?
– Bəli, var. Qardaşım “Kəpəz” klubunda futbolla məşğul olur.
– Bu idman növünü seçməyinin əsas səbəbi nə idi?
– İlk olaraq atam və anamın istəyi, sonra isə məşqçinin peşəkarlığı mənim məhz gimnastikanı seçməyimə səbəb oldu.
– Gimnastika ilə məşğul olarkən qarşılaşdığın ən böyük çətinlik nə olub?
– Məşqlərə başlayanda çətinliyim olub. İlk məşqlərdə çox yorulurdum.
– Gimnastikaya başlamağı düşünən gənc qızlara hansı məsləhətləri verərdin? Çünki bəzi ailələr var ki, qızının idmanla məşğul olmağına icazə vermir.
– Gimnastika demək olar ki, bədən sağlamlığı üçün ən yaxşı idman növüdür. Bu idman növü ilə məşğul olmaq qızlar üçün ən doğru seçimdir.
– Gimnastika sənə həyatında nələri öyrədib?
– Sağlam həyat tərzi, qaydalara əməl etmək bacarığı.
– Gimnastikada ən böyük uğurun nə olub?
– Düşünürəm ki, gimnastika ilə məşğul olmaq və müxtəlif nailiyyətlər qazanmaq elə uğurdur.
– Ən böyük dəstəkçin kim olub?
– Ailə üzvlərim – nənəm, babam və anam.
– Gələcəkdə təhsilini hansı sahə üzrə davam etdirməyi düşünürsən? İdman üzrəmi?
– Gələcəkdə gimnastika üzrə məşqçi olmaq istəyirəm. Baxmayaraq ki, eyni zamanda həm də musiqi məktəbində təhsil alıram. Ancaq seçimim idmandır.
– Ən böyük arzun nədir?
– Ən böyük arzum uğurlarımla xarici ölkələrdə himnimizi səsləndirməkdir.
– Atan bu günlərini görsəydi sevinərdi…
– Bəli, sevinərdi. Amma mən atamı hər uğurumda yanımda hiss edirəm. Atam yanımda olsaydı, ən böyük dəstəkçim o olardı.
– Olimpiadada iştirak etməyi düşünürsənmi?
– Olimpiada idmanla məşğul olan hər uşaq və gəncin arzusu olduğu üçün mənim də arzularımdan biridir.
Nəzrin Vahid
