Elm və Təhsil Nazirliyi, Təhsil İnstitutu, Məktəbəqədər və Ümumi Təhsil üzrə Dövlət Agentliyinin təşkilatçılığı, Bakı Ali Neft Məktəbinin ev sahibliyi ilə məktəblilərarası IX Fənn Müsabiqələri keçirilib.
Bilik yarışında 6 və 7-ci sinif şagirdləri riyaziyyat, informatika, təbiət, kimya, fizika və biologiya fənləri üzrə biliklərini sınayıblar.
Gəncə şəhər M.Ş.Vazeh adına 16 nömrəli tam orta məktəbin 7-ci sinif şagirdi Nərmin Abbasəli qızı Ələkbərova riyaziyyat fənni üzrə ikinci yer tutub.
Qeyd edək ki, N.Ələkbərova birincilikdə Gəncə-Daşkəsən Regional Təhsil İdarəsinin tabeliyində olan məktəbləri təmsil edən iştirakçılar arasında həmin fənn üzrə gümüş medala layiq görülən yeganə şagirddir.
Gencexeber.az-ın əməkdaşı bilik yarışında uğur qazanan yeniyetmə Nərmin Ələkbərova ilə həmsöhbət olub.
Müsahibəni təqdim edirik:
– Nərmin, öncə özün haqqında məlumat verməyini istərdim.
– 2012-ci il mart ayının 19-da Gəncə şəhərində anadan olmuşam.
– Bilik yarışmasına necə hazırlaşdın? Bu proses sənin üçün necə keçdi?
– Demək olar ki, bilik yarışlarına ibtidai sinifdən etibarən marağım olub və bu günə qədər müxtəlif yarışlarda iştirak edib uğur qazanmışam. Ən böyük uğurum isə bu il Respublika Fənn Müsabiqəsində riyaziyyat fənni üzrə gümüş medal qazanmağımdır. Bu proses mənim üçün kifayət qədər maraqlı və həyəcanlı keçdi.
– Yarışma zamanı özünə necə güvəndin? Çətin anlar oldumu və onları necə aşdın?
– Düşünürəm ki, bu cür müsabiqələrdə və olimpiadalarda uğur qazanmağın ən önəmli şərtlərindən biri özümə güvənib, inanmağımdır. Yarış zamanı bəzi suallar mənə çətin gəlsə də, diqqətimi toplayaraq, onları həll etməyi bacardım.
– Bilik yarışmasında qalib olmağın sənə necə hisslər yaşatdı?
– Əziyyətinin nəticəsini görən hər bir insan kimi mən də sevinc və qürur hissi yaşadım.
– Yarışmada qazandığın mükafatı necə qiymətləndirirsən? Bu uğur sənə gələcəkdə nə kimi imkanlar yaradacaq?
– Qazandığım bu mükafat mənə ölkənin istənilən liseyinə müsabiqədənkənar qəbul olmağıma imkan verdi və mənim seçimim Gəncə şəhər Fizika, riyaziyyat və informatika təmayüllü lisey oldu.
– Yarışma nəticəsində hansı təcrübələri qazandın? Gələcəkdə bu təcrübələrdən necə istifadə etməyi planlaşdırırsan?
– Bu müsabiqəyə hazırlaşarkən ən böyük təcrübəm uğur qazanmaq üçün çəkilən zəhmətin heç vaxt boşa getməməsi oldu.
– Sənə ən çox dəstək olan insanlar kimlərdir?
– Ən böyük dəstəkçilərim valideynlərim, müəllimlərim və dostlarım olub.
– Gələcəkdə hansı məqsədlərə çatmaq istəyirsən? Bu uğur sənə hansı yolda irəliləməkdə kömək edəcək?
– Qazandığım bu uğurun mənim daha böyük nailiyyətlimin başlanğıcı olduğunu düşünürəm. Qarşıma qoyduğum ən böyük məqsəd növbəti illərdə Beynəlxalq olimpiadalarda uğur qazanıb Azərbaycanı qürurla təmsil etməkdir.
– Yarışmaya qatılmaq istəyənlərə nə məsləhət verərsən?
– Yaşıdlarıma məsləhətim odur ki, vaxtlarını düzgün şəkildə planlaşdırsınlar və səmərəli istifdə etsinlər.
– Hansı sahə üzrə təhsil almağı düşünürsən?
– Gələcək təhsilimi tibb və ya süni intellekt sahələrində davam etdirməyi planlaşdırıram.
Nəzrin Vahid
