2020-ci ilin sentyabrın 27-də Ermənistanın cəbhə xəttində törətdiyi genişmiqyaslı təxribatlara cavab olaraq başlayan və 44 gün davam edən Vətən müharibəsində Azərbaycan Ordusu tarixi Zəfərə doğru irəliləyirdi. Prezident İlham Əliyevin rəhbərliyi altında həyata keçirilən bu əməliyyatlar Azərbaycanın ərazi bütövlüyünü bərpa etdi və möhtəşəm Zəfər tarixə qızıl hərflərlə yazıldı.
Müharibənin 40-cı günü Ağdərə və Xocavənd istiqamətində döyüşlər davam etdi.
Prezident İlham Əliyev “X” (əvvəllər “Twitter”) platformasındakı paylaşımında işğaldan azad edilən yaşayış məntəqələrini elan edib: Cəbrayıl rayonunun Şıxalıağalı, Sarıcallı, Məzrə və Qışlaq kəndləri.
Azərbaycan Ordusunun hücumları nəticəsində düşmən geri çəkilməyə məcbur oldu. Eyni gün Prezident İlham Əliyev İspaniyanın EFE informasiya agentliyinə müsahibə verdi, Müdafiə Nazirliyi isə Füzuli və Xocavəndin azad edilən kəndlərinin görüntülərini yayımladı.
Tərtər istiqamətində dəqiq artilleriya zərbələri ilə Ermənistanın 10-cu dağatıcı diviziyasının qərargahı məhv edildi. Müdafiə Nazirliyi, həmçinin düşməndən ələ keçirilmiş hərbi texnikaların görüntülərini ictimaiyyətə təqdim etdi. Goranboya “Smerç” raketinin atılması və düşmən artilleriyasının pusquya salınaraq məhv edilməsi həmin günün önəmli hadisələri idi.
Baş Prokurorluğun verdiyi məlumata görə, sentyabrın 27-dən noyabrın 5-dək davam edən düşmən təxribatları nəticəsində 92 mülki şəxs həlak olub, 404 nəfər yaralanıb, minlərlə ev və mülki obyekt ciddi ziyan görüb.
