Gencexeber.az-ın məlumatına görə, hadisənin istintaqı Gəncə Ağır Cinayətlər Məhkəməsinin hakimi Mikayıl Məmmədzadənin sədrliyi ilə keçirilib.
Belə ki, təqsirləndirilən Teymur Ocaqverdiyev 1971-ci ildə Daşkəsən rayonunda anadan olub. O, arvadı Atlas Ocaqverdiyevanın həmkəndlisi Elvin Əliyev ilə ona xəyanət etməsindən şübhələnib. Kənd camaatı arasında utanc hissi keçirdiyi üçün arvadını qəsdən öldürmək qərarına gəlib.
Bu məqsədlə gecə saatlarında birgə yaşadıqları Daşkəsən rayonu, Əmirvar kəndində yerləşən evin həyətindən balta götürüb. Yataq otağında yatan həyat yoldaşının yanına gələrək xüsusi amansızlıqla dəfələrlə balta zərbəsi endirib. Nəticədə Atlas Ocaqverdiyeva həyatını itirib.
Teymur Ocaqverdiyev Azərbaycan Respublikası CM-nin 120.1-ci (qəsdən adam öldürmə) maddəsi ilə təqsirləndirilib.
Məhkəmədə təqsirləndirilən şəxs qismində ifadən verən Teymur Ocaqverdiyev özünü ittiham üzrə təqsirli bilib:
“Evə gələndə qapının bağlı olduğunu görüb döydüm. Atlas həyəcanlı halda qapıya çıxdı. Evə girəndə qapının arxasında həmkəndlim Elvinin gizləndiyini gördüm. Onu döymək üçün üstünə cumanda ayağıma düşüb yalvarmağa başladı. Bunu unutmamaq üçün evin divarına boya ilə “14 may” sözünü yazdım. Bir neçə gün sonra axşamtərəfi Atlasla Elvinin yenə də birlikdə tövlə tərəfdən gəldiyini gördüm. Həmin gecə söhbət etdik, Atlas dəfələrlə Elvinlə mənə xəyanətini etiraf elədi. Atlasın bu hərəkətlərinə görə mən və uşaqlarım kənd içində biabır olmuşuq. Atlasın sözlərindən bərk hirslənib, həyətə gedib baltanı götürdüm. Daha sonra evə qayıdaraq Atlası balta ilə vurdum”.
Məhkəmə istintaqı zamanı şahid qismində dindirilmiş Elvin Əliyev ifadəsində göstərib:
“Atlas və Teymuru həmkəndli kimi tanıyıram. Teymurun iri buynuzlu heyvanı çəpəri dağıdıb təsərrüfatımdakı sahəyə ziyan vurmuşdu. Buna görə Teymurgilə səsləndim və həmin vaxt səsimə mərhum Atlas Ocaqverdiyeva çıxdı. Atlasdan mal-qarasını mənim ərazimə buraxmamalarını xahiş etdim. Bu zaman Teymur kənardan çıxaraq nalayiq ifadələr işlətməyə başladı. Teymur kənd içində söyüşlə danışan şəxs kimi tanındığından heç nə demədən evə getdim”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Teymur Ocaqverdiyev 17 il müddətində azadlıqdan məhrum edilib.
Fidan İlqar
