Azərbaycanda alimentin artırılması məsələsi ölkədə hər zaman müzakirə olunan aktual mövzulardan biridir. Alimentin artırılması barədə qərar verilərsə, bu, boşanmış valideynlər arasında maliyyə yükünü dəyişə bilər
Milli Məclisin Əmək və sosial siyasət komitəsi ilə İqtisadi siyasət, sənaye və sahibkarlıq komitəsinin ötən gün keçirilən birgə iclasında 2025-cü ilin yanvarın 1-dən etibarən Azərbaycanda alimentin minimum məbləği 235 manatdan 246 manata qaldırılacağı məsələsi müzakirəyə çıxarılıb.
İqtisadiyyat Nazirliyinin şöbə müdiri Hüseyn Hüseynov iclasda uşaqlar üçün yaşayış minimumunun 2028-ci ildə 275 manat olacağını bildirib.
Xatırladaq ki, alimentin minimum məbləği 2023-cü ildə 220 manat, 2024-də 235 manat olub.
Bəs görəsən, aliment məbləğinin hər il qaldırılmasının səbəbi nədir?
Mövzu ilə bağlı Bakuplus.az-a açıqlama verən Milli Məclisin deputatı Aydın Hüseynovun sözlərinə görə, minimum əmək haqqının 345 manatdan 400 manata qaldırılması bütün kateqoriyadan olan əmək haqlarının artımına səbəb olacaq:
“Artıq parlamentdə 2025-ci ilin dövlət büdcəsinin layihəsi müzakirə olunur. Minimum əmək haqqının 345 manatdan 400 manata qaldırılması bütün kateqoriyadan olan əmək haqlarının artımına səbəb olacaq. Bu, həm özəl, həm də büdcə təşkilatında çalışan işçilərə də aiddir.
Digər tərəfdən, minimum əmək haqqının artırılması, pensiyanın və yaşayış minimumun artımını da səciyyələndirir. Yaşayış minimumunun 275 manat olacağı proqnozlaşdırılır. Bu artım pensiyalara, əmək haqlarına, müavinat və alimentə təsir edəcək. Uşaqlar üçün yaşayış minimumunun 275 manat olacağı proqnozlaşdıırlır”.
Milli Məclisin deputatı Müşfiq Məmmədli qeyd edib ki, alimentin məbləğinin artması yaşayış minimumunun artması ilə əlaqəlidir:
“Azərbaycan sosial dövlət olduğu üçün yaşayış minimumunun artması digər sahələrdəki dəyişiklikləri səciyyələndirir. Yaşayış minimumu artdıqca uşaqlara xərclənəcək vəsaitin artması da nəzərdə tutulur. Aliment məbləğinin artması yaşayış minimumunun artması ilə bağlıdır.
Yaşayış minimumunun artması ölkədə hədəflənən inflyasiyaya və müxtəlif xərclərin artımı baxımından proqnozlaşdırılır. Bu istiqamətdə yaşayış minimumu ilə paralel şəkildə alimentin artması mümkündür. Enməsi mümkün deyil. Biz həmin məbləğin artmasını müşahidə edirik. Sosial dövlət prinsipləri bunu labüd edir”.
Nəzrin Vahid
