Ötən gün Sabirabadda məktəbin dəhlizində xoruzun gəzməsi, həyətində isə qoyunların otlaması barədə xəbər verərək müvafiq videogörüntüləri oxucularımızın diqqətinə təqdim etmişdik.
Cenublu.az-a bununla bağlı adıçəkilən rayonun İcra Hakimiyyəti tərəfindən açıqlama verilib.
Bildirilib ki, İsmayıl Musayev adına Sarxanbəyli kənd tam orta məktəbinin direktoru video çəkilən zaman binada olmayıb:
“Məktəb direktoru müvafiq izahat verərək bildirib ki, çəkiliş aparılan zaman 20 saylı Sarxanbəyli kənd məntəqə seçki komissiyasının sədri olaraq bələdiyyə seçkiləri ilə əlaqədar 68 saylı Sabirabad-Şirvan Seçki Dairəsində iclasda iştirak etdiyi üçün məktəbdə olmayıb.”
Sabirabad rayon Təhsil Sektorunun rəhbərliyi bildirib ki, məktəb direktoru barəsində intizam tənbehi görüləcək, gələcəkdə belə hallara yol verilməməsi və məktəbin mühafizəsinə nəzarətin gücləndirilməsi üçün ciddi tapşırıq verilib.
Əlavə olunub ki, təhsil müəssisələrinin təmir-tikintisi dövlət büdcəsindən Elm və Təhsil Nazirliyinə ayrılmış vəsait çərçivəsində mərhələli şəkildə həyata keçirilir və həmin təhsil müəssisəsinin əsaslı təmir məsələsinə növbəti illərin dövlət investisiya proqramı çərçivəsində baxılacaq.
