Özbəkistanda Beynəlxalq Turizm Mərkəzinin yaradılması planlaşdırılır.
İnsanoid.com xəbər verir ki, Özbəkistan Prezidenti Şavkat Mirziyoyev Daşkənd vilayətinin Bostanlıq rayonunda inşa edilməsi planlaşdırılan beynəlxalq turizm mərkəzinin layihəsi ilə tanış olub.
Beynəlxalq əlaqələrin genişlənməsi və ölkədə infrastrukturun inkişafı ilə Özbəkistanın turizm potensialı sürətlə artır. Əsas turizm məkanlarından biri olan Bostanlıq rayonu Çarvak su anbarı, çayları, qarla örtülü dağları və füsunkar meşələri ilə istənilən mövsümdə istirahət üçün ideal şərait təqdim edir.
Son illərdə dövlət dəstəyi ilə bölgədə bir sıra yeni turizm kompleksləri, o cümlədən "Amirsay" və "Beldersay-Çimqan-Nanay" kurortları yaradılıb. Xüsusilə, son beş ildə rayona 2 trilyon somdan çox investisiya cəlb olunub, 13 min yerlik 59 yeni turizm obyekti istifadəyə verilib.
Bu nailiyyətlər xarici investorların diqqətini cəlb edib və daha genişmiqyaslı layihələrin reallaşdırılması üçün imkanlar açıb. Belə ki, azərbaycanlı iş adamı Emin Ağalarov və bir sıra iri investisiya şirkətləri Çarvak su anbarının sahilində “Sea Breeze Uzbekistan” adlı beynəlxalq turizm mərkəzi yaratmaq niyyətlərini ifadə ediblər.
Layihəyə əsasən, mərkəzdə istirahət zonaları, çimərliklər, idman meydançaları, mehmanxanalar, koteclər və yaşayış kompleksləri inşa ediləcək. Beynəlxalq brendlərin mağazaları, restoranlar və xidmət məntəqələri də fəaliyyət göstərəcək. Burada müxtəlif festivallar, konsertlər və mədəni tədbirlər təşkil ediləcək. Ziyarətçilərin rahatlığı üçün körfəz üzərində körpünün tikilməsi də nəzərdə tutulur. Mərkəz gələcəkdə ilboyu istirahət və yaşayış üçün unikal turizm mərkəzinə çevriləcək.
Prezident bu təşəbbüsü dəstəkləyərək mərkəzin müasir beynəlxalq təcrübə əsasında mərhələli şəkildə inşasını vacib sayıb. Layihənin həyata keçirilməsi üçün hüquqi bazanın hazırlanması, baş nazirin rəhbərliyi ilə komissiyanın yaradılması və infrastruktur problemlərinin həlli istiqamətində göstərişlər verilib.
[gallery size="full" ids="210354,210355"]
