Türkiyəli futbol mütəxəssisi, "Qalatasaray" və Türkiyə millisinin sabiq baş məşqçisi Fatih Terim, Bakıda keçirilən COP29 çərçivəsində "Qarabağ" Futbol Klubunun təşəbbüsü ilə yaradılacaq futbol klublarının iqlim dəyişikliyi ilə mübarizə alyansında iştirak edən komandalarla görüşüb.
İnsanoid.com xəbər verir ki, Terim, Bakıda olmaqdan məmnunluğunu ifadə edərək, COP29-un Azərbaycanda keçirilməsini və Bakının belə böyük bir tədbirə ev sahibliyi etməsini qürurverici adlandırıb. Şəhərdə tədbirin yüksək səviyyədə təşkili üçün yaradılan ab-havanı təqdir edib və bu uğura töhfə verən hər kəsi təbrik edib.
"Qarabağ" Futbol Klubuna xüsusi dəvət və isti münasibət üçün təşəkkür edən Terim, klubun baş məşqçisi Qurban Qurbanovla səmimi söhbət etdiyini və onu daim izlədiyini bildirib. O, həmçinin Türkiyədə futbolçu kimi çıxış etmiş və hazırda həmkarı olan Sadıq Qarayevə salamlarını çatdırıb.
Fatih Terim, COP29 rəhbərliyi və dəstəyi ilə "Qarabağ" və Avropa Klublar Birliyinin birgə təşkilatçılığı ilə yaradılacaq bu ittifaqın gələcəkdə daha çox klubun iştirakı ilə güclənəcəyinə əminliyini ifadə edib.
