“Azərbaycan Qarabağı işğal etmədi, geri qaytardı”.
Bunu Fransanın keçmiş dövlət katibi, sabiq ətraf mühit naziri, BMT-nin Davamlı İnkişaf Konfransının icraçı koordinatoru Bris Lalonde “France 24” telekanalına müsahibəsi zamanı deyib.
COP29-un Bakıda keçirilməsini, Fransa ilə Azərbaycan arasında münasibətlərin aşağı səviyyəsini və Cənubi Qafqazdakı vəziyyəti şərh edən Lalonde vurğulayıb ki, Makron fikir ayrılıqlarına baxmayaraq, bu tədbirdə iştirak etməli idi.
“Bəli, bizim Ermənistanla əla münasibətlərimiz var, amma bu o demək deyil ki, 1990-cı ildə Qarabağı qanunsuz zəbt edən Ermənistanın bunu etmək hüququ var idi”, - eks-nazir qeyd edib.
Aparıcı Fransa prezidentinin davranışına haqq qazandırmağa çalışaraq, Trampın iqlim məsələlərinə şübhə ilə yanaşdığını əsas gətirərək, “buna görə də Makron orada iştirakını mənasız hesab edir” deyib. Buna cavab olaraq sabiq nazir vurğulayıb ki, bu, bir siyasətçidən gözlənilən davranış deyil.
"Lider israrlı olmalı və öz yolundan dönməməlidir. Əgər əvvəllər onun mövqeyi belə idisə, o, iqlim problemləri üzərində işləməyə davam etməli idi", - deyə Lalonde yekunlaşdırıb.
