İnsult keçirən Xalq artisti Ənvər Həsənovun vəziyyəti ağır olaraq qalır.
Bu barədə Bakuplus.az–a aktyorun qızı Aytən Həsənova məlumat verib.
Bildirib ki, atamın vəziyyəti yaxşı deyil:
“Reabilitasiya şöbəsində qalmağı məsləhət bilmədik. Danışıq qabiliyyətini itirib, yaddaşı yerində deyil. Xəstəxanada saxlamağın mənası idi. Bu səbəbdən də evə gətirdik. Heç kəsi tanımır, sanki yad yerdədir. Danışmır, eşitmir, başa düşmür. Hər şeyi unudub. Gəzdiririk, yedizdiririk, otuzdururuq. Su istəyəndə başa sala bilmir. Ümidimizi itirmirik. Köməksiz bu insan nə isə edə bilmir”.
A.Həsənova qeyd edib ki, hər evə buraxılan xəstə yaxşı olmur:
“Yalan yazırlar ki, yaxşıdır, evə buraxılıb. Hər evə buraxılan yaxşı olmur. Yaşı da öz sözünü deyir. İnsultun ocağı da dərindir. Yaxşı olması üçün yaşı kaş az olardı. Vəziyyəti yaxşı deyil. Müddəti gözləyirik. Ümidimizi itirmirik”.
Qeyd edək ki, Ənvər Həsənov Azərbaycan kino sənətinin inkişafındakı xidmətlərinə görə 18 dekabr 2000-ci ildə Azərbaycanın Əməkdar artisti, 1 avqust 2018-ci ildə isə Xalq artisti fəxri adlarına layiq görülüb. 6 may 2023-cü ildə Azərbaycan mədəniyyətinin inkişafında xidmətlərinə görə Azərbaycan Respublikası Prezidentinin fərdi təqaüdünə layiq görülüb.
Ə.Həsənov “Yeddi oğul istərəm” filmində Cəlal, “Dərviş Parisi partladır” filmində Şahbaz, “Babək” filmində Tərxan, “Atları yəhərləyin” filmində Sirac, “Uşaqlığın son gecəsi” filmində Murad və başqa yaddaqalan obrazlar yaradıb.
Nəzrin Vahid
