Bir neçə gün öncə insult keçirən Xalq artisti Ənvər Həsənovun vəziyyəti yenidən ağırlaşıb.
Bakuplus.az xəbər verir ki, bu barədə aktyorun qızı Aytən Həsənova məlumat verib.
Bildirib ki, atasının vəziyyəti ağırdır:
“Kəskin insult keçirib. Həkimlər deyir vəziyyəti orta-ağırdır. Özü də çox zəifləyib. Neçə vaxtı səhhətinin normallaşması üçün mübarizə aparır. Reanimasiyadan palataya özümüz keçirdik. Palatanı özü istədi. Bizdən olsa hələ də reanimasiyada olmalıydı. Bütün reanimasiya həkimləri yanındadırlar.
İnsult atamın danışığına təsir göstərib. Hazırda danışa, ayağa da qalxa bilmir. Sol tərəfi tutulub. Ümidimizi itirmirik”.
Qeyd edək ki, Ənvər Həsənov Azərbaycan kino sənətinin inkişafındakı xidmətlərinə görə 18 dekabr 2000-ci ildə Azərbaycanın Əməkdar artisti, 1 avqust 2018-ci ildə isə Xalq artisti fəxri adlarına layiq görülüb. 6 may 2023-cü ildə Azərbaycan mədəniyyətinin inkişafında xidmətlərinə görə, Azərbaycan Respublikası Prezidentinin fərdi təqaüdünə layiq görülüb.
Ə.Həsənov “Yeddi oğul istərəm” filmində Cəlal, “Dərviş Parisi partladır” filmində Şahbaz, “Babək” filmində Tərxan, “Atları yəhərləyin” filmində Sirac, “Uşaqlığın son gecəsi” filmində Murad və başqa yaddaqalan obrazlar yaradıb.
Nəzrin Vahid
