İsmayıllıda kişi əxlaqsız yola düşən arvadı ilə bibisi qızını bıçaqlayıb.
Shimal.News-un əldə etdiyi məlumata görə, hadisənin istintaqı Sumqayıt Ağır Cinayətlər Məhkəməsində keçirilib.
Belə ki, 1996-ci il təvəllüdlü Novruz Nəcəfov (ad şərtidir) İsmayıllıda doğulub. Novruz bibisi qızının əxlaqsız həyat tərzi sürdüyünü zənn edib. O düşünüb ki, bibisi qızı onun arvadı ilə ünsiyyətdə olmaqla mənfi təsir göstərir, arvadının əxlaqını pozur. Bundan sonra arvadının ona əri kimi münasibət göstərməyəcəyinə, hörmət etməyəcəyinə inanıb. Qadının uşaqları onun üstünə atıb, Bakıya gedəcəyi və tanışları arasında rüsvay olacağı qənaətinə gələrək qisas almaq istəyib.
Sentyabrın 12-si evin qarşısında dayanmış avtomobilin ön oturacağında əyləşən bibisi qızı Günel Hüseynovanı (ad şərtidir) və arxa oturacaqda əyləşən həyat yoldaşı Elmira Nəcəfovanı (ad şərtidir) öldürmək qərarına gəlib. Bu məqsədlə üzərində gəzdirdiyi bıçağı gizlədərək avtomobilin sol arxa qapısına yaxınlaşıb. Avtomobildə cütlüyün 3 azyaşlı övladı da olub. Onların gözü qarşısında arvadı Elmiranı 4 dəfə bıçaqlayıb. Daha sonra qadının öldüyünə əmin olmaq üçün onu əlləri ilə boğub.
Bu əməli törətdikdən sonra isə bibisi qızının qaçmaması üçün ön sərnişin qapısına yaxınlaşaraq çoxsayılı bıçaq zərbəsi endirib. Həmin vaxt hadisənin şahidi olan sürücü maşını oradan uzaqlaşdıraraq zərərçəkmişləri xəstəxanaya aparıb.
Novruz Nəcəfov Azərbaycan Respublikası CM-nin 29, 120.2.4 və 29, 120.2.7-ci (qəsdən həyatdan məhrum etmə) maddələri ilə təqsirləndirilib.
Məhkəmədə təqsirləndirilən şəxs qismində dindirilən Novruz Nəcəfov ona qarşı irəli sürülən ittiham üzrə özünü qismən təqsirli bilib. O ifadəsində göstərib ki, əslində yoldaşını yox, bibisi qızını öldürmək istəyib:
“Bıçağı götürərək birinci yoldaşımı, sonra isə bibim qızını vurdum. Həmin vaxt taksi sürücüsü maşını sürüb getdi. Daha sonra özüm gedib təslim oldum. Münasibətlərimiz normal olub. Hadisəni nə üçün törətdiyimi bilmirəm. Bibim qızını öldürmək istəyirdim, amma yoldaşımı öldürmək fikrim yox idi. İçkili olduğum üçün bibim qızı Güneli 7 dəfə bıçaqlamışam. Yorulduğum üçün bıçaqlamağı dayandırdım. Əməlimdən peşmanam”.
İsa Nəcəfovun ibtidai istintaq zamanı verdiyi ifadə məhkəmə zalında elan olunub. O, ifadəsində göstərib:
“Hadisədə özümü təqsirli bilmirəm. 7 ildir ki, xalam qızı Elmira ilə evliyəm. Elmira ilə evliliyimizdən Nəzakət, Nəzrin və Zəhra adlı üç azyaşlı qızımız var. Bibim qızı Günel subay vaxtı dəfələrlə məndən xoşu gəldiyini və evlənmək istədiyini deyib. Lakin mənim ondan xoşum gəlmirdi. Ona görə razı olmurdum. Günel Səid adlı şəxslə evil olub və boşanıb. Hətta evil olduğumuz vaxtda da məndən xoşu gəldiyini deyirdi. Arvadım Elmira ilə Günel arasında münasibət həmişə yaxşı olub. Ancaq Elmira ilə Günel mehriban olandan bəri həyat yoldaşım məndən boşanmaq istədiyini deyirdi. Boşanıb Günellə Bakıya gedəcəyini bildirirdi. Elmiraya dedim ki, Bakıda özümə iş tapıb, ev alıb, səni də özümlə aparacam.
Bir gün evə gələndə Elmiranın evdə olmadığını gördüm. Böyük qızım Nəzakət anasının Günellə işləmək üçün getdiyini dedi. Bir müddət sonra “Tiktok”da “Nonono” adlı saxta hesabdan Günelin “Günel056” adlı hesabına izləmək üçün istək atdım. Yazmağı bacarmadığım üçün dostum Fəridə müraciət etdim. Fəridin dəstəyi ilə hesabın mesaj qutusunda Günelə tanışlıq təklif etdim, o da razılaşdı. Sonra dedi ki, yanında bacısı Zəhra var. Mənim yoldaşım Elmiraya çox vaxt Zəhra deyirlər. Ondan sonra bildim ki, bunlar bir yerdə Gəncədədirlər. Tam dəqiqləşdirmək üçün şəkil istədim. O da Elmira ilə şəkilini yolladı. Görüşmək üçün vaxt təyin etdik. Görüşə gedəndə Elmira ilə Günelin gəldiyini gördüm. Onlara yazan şəxsin mən olduğumu anladılar. Elmiranı öz evimizə apardım, Günel isə mənimlə gəlmədi. Elmira evə gəlsə də, yenə fikri Güneldə idi. Onun yanına getmək istəyirdi. Günellə əlaqəsini kəsməsini desəm də, razılaşmırdı. Bir dəfə yenə evdən qaçdı, mənə boşanmaq istədiyini və uşaqları mənə verib Bakıya gedəcəyini dedi. Bundan hiddətlənib Güneli öldürmək qərarına gəldim. Çünki o, yoldaşımın əxlaqını pozmuşdu”.
Məhkəmə istintaqı zamanı zərərçəkmiş Günel Hüseynova ifadə verib:
“Novruzgil ilə münasibətimiz həmişə yaxşı olub. Onlarda olanda Novruz mənim yanımda dəfələrlə Elmiranı döyüb. Hətta bir dəfə döydüyünə görə Elmira yataq otağında özünü asaraq intihara cəhd edib. Elmira ilə birlikdə işləmək üçün Gəncə şəhərinə getdik. Təxminən bir ay sonra Novruz Gəncəyə gəlib, Elmiranı razı salıb, özü ilə apardı. Hadisə günü mən avtomobilin ön oturacağında əyləşmişdim. Novruz Elmira tərəfdən qapını açıb 10 saniyə dayanmadan bıçaqlamağa başladı. Sonra mən tərəfə gələrək məni də bıçaqladı”.
Məhkəmə tədqiq edilmiş sübutlara məcmu halda hüquqi qiymət verərək Novruz Nəcəfovu cinayət üzrə təqsirli bilib.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Novruz Nəcəfov 11 il 3 ay müddətinə azadlıqdan məhrum edilib.
Fidan İlqar
