İspaniyanın "Sevilya" klubu "Qarabağ"ın braziliyalı hücumçusu Olavio Juninyonun transferini demək olar ki, tamamlayıb. Bu barədə İspaniyanın "Ficherio.com" nəşri məlumat yayıb.
Mənbənin məlumatına görə, futbolçu ilə şəxsi müqavilə şərtləri artıq razılaşdırılıb və transfer üçün yalnız "Qarabağ" klubunun rəsmi təsdiqi gözlənilir. Əvvəlcə əndəlüslülər transfer üçün 2 milyon avro təklif etsələr də, Ağdam klubu bu məbləği qəbul etməyib. Nəticədə, "Sevilya" transferin baş tutması üçün 3+1 milyon avro ödəməyi qəbul edib.
Olavionun Misli Premyer Liqasının III turundan təxirə salınan "Şamaxı" ilə oyunda iştirak etməməsinin səbəbi də məlum olub. "Qarabağ"ın baş məşqçisi Qurban Qurbanov matçdan sonra keçirilən mətbuat konfransında futbolçunun transfer danışıqları səbəbilə oyuna hazır olmadığını bildirib.
"Olavio transfer söhbətlərinə görə bir neçə gündür ki, az yatdığını və oyuna tam hazır olmadığını dedi. Ona bu səmimiyyətinə görə təşəkkür etdim. Komandamızdan gedən hər futbolçu mənim üçün problem yaradır. Yeni gələnlərin uyğunlaşması vaxt tələb edir və bu, işimizi çətinləşdirir," - deyə Qurbanov vurğulayıb.
Baş məşqçi, "Sevilya"dan rəsmi təklif almanın müsbət bir addım olduğunu bildirib: "Avropa bazarına çıxmışıq. "Böyük Beşlik"dən təklif gəlməsi irəliyə doğru bir addımdır. Juninyonun özü də getmək istəyir. Digər liqalardan təklif gələndə onun marağı az olurdu. İndi isə bu təklifdən o qədər sevinib ki, yuxusuz qaldığını deyir."
Qeyd edək ki, 2023-cü ilin yayından "Qarabağ"da çıxış edən Olavio Juninyo 47 çempionat oyununda 23 qol vuraraq komandanın əsas hücumçularından biri olub.
