“Anam toy müğənnisi idi, indi uzaqlaşıb. Tam musiqi təhsilim olmasa da, təhsilsiz də deyiləm”.
Bunu lent.az-a müsahibəsində hamının "Tamara", "Niqulya xanım" kimi tanıdığı məşhur müğənni Kəmalə Günəşli deyib.
Həmin müsahibəni təqdim edirik:
- Kəmalə xanım, istəyirəm öncə sizi tamaşaçılarınıza yaxından tanıdaq.
- Məni çox adam rayonlu bilir. Çünki rayon toylarından həddən çox dəvət alıram. Şirvan, cənub zonası mənə baxır (gülür), bakılıyam. Yasamalda anadan olmuşam. Atam “Sovetski”də, anam Türkanda doğulub. 7 yaşım olanda Günəşliyə köçmüşük. 30 ildir orada yaşayıram. Ona görə Günəşli təxəllüsünü götürmüşəm. Səhnəyə ilk çıxanda sadəcə Kəmalə adı ilə çıxırdım. Amma düzünü deyim, lap belə pulunu verib efirlərə çıxsam da, tanınmırdım. Uşaqlıqdan oxuyuram. Anam toy müğənnisi idi, indi uzaqlaşıb. Tam musiqi təhsilim olmasa da, təhsilsiz də deyiləm. Musiqi dərsləri almışam. “Tamara” mahnısı ilə ulduzum bir gecədə parladı.
- Bir də Niqulya xanım deyirlər axı sizə.
- (Gülür). Hə, ölkədə yeganə müğənniyəm ki, prodüserim məni yox, mən prodüserimi məşhurlaşdırmışam, onun adı ilə tanınıram. Nigar xanımla bir neçə ildir birlikdəyik. Bu ideya məndən gəldi, dedim çəkək. Hər dəfə ona videoçarxda “Niqulya xanım” deyə müraciət edirəm.
- İzləyicilərinizə çox maraqlıdır, sizin sponsorunuz var?
- Azərbaycanda yeganə müğənniyəm ki, öz hesabıma irəli getmişəm. Nə “həcim” var, nə sponsorum. Hansısa həci mənə maşın almayıb, yaxın günlərdə doğum günüm oldu, özümə bir ev, bir də avtomobil hədiyyə etdim.
- Ailəlisiniz?
- Bəli. Həyat yoldaşım da musiqiçidir. İkinci dəfə ailə qurmuşam. Gözəl ailəm var. Məni anlayır.
- Övladlarınız var?
- Bəli var. Əsgər anasıyam. Bir də qızım var.
- Bəs aldığınız qonorardan əlavə əlinizə verilən o şabaşlar nə qədər olur təxminən?
- Elə olub ki, 2-3 min manat olub. Məsələn dünənki məclisdə əlimdə 1500 manat var idi.
- Ən bahalı mahnıya nə qədər pul vermisiniz?
- 2-3 min, eləsi olub 7 minə başa gəlib.
- Çita dünyanın o başıdır. Ora toya neçəyə getmişdiz?
- Elə baha deyildi. 8 min dollara getmişdim. 10 saat təyyarədə yol getdik.
- Bəs kişi fantlarınızla münasibətləriniz necə formalaşıb. İçki məclislərində istər-istəməz xoşagəlməz məqamlar yaşanır.
- O qədər başlarda mikrofon sındırmışam. Kimsə ilişirdi, on qat cavabını verirdim. Stol üstündə çaynik-çaydan qalmırdı, vurub dağıdırdım. Elə “Çini çaydan” belə yarandı da (gülür).
