Argentina millisinin ulduz futbolçusu Lionel Messi və ABŞ-nın "İnter Mayami" klubundakı komanda yoldaşları Luis Suares, Serxio Buskets və Xordi Alba Bakıya xüsusi qayğıya ehtiyacı olan uşaqlara dəstək məqsədilə səfər ediblər.
İnsanoid.com xəbər verir ki, futbol ulduzları Bakı Kristal Zalında təşkil olunan xeyriyyə tədbirində iştirak edərək sağlamlıq imkanları məhdud uşaqlar, uşaq evlərinin sakinləri və şəhid ailələrinin övladları ilə görüşüblər.
Tədbir zamanı futbolçular azarkeşlərlə xatirə şəkilləri çəkdirib, imzalı topları auditoriyaya ataraq sevinc dolu anlar yaşadıblar. Minlərlə azarkeşin iştirak etdiyi gecədə məşhur musiqi qrupları da çıxış edərək tədbirə xüsusi rəng qatıblar.
Lionel Messi zala üzərində özünə məxsus avtoqraf olan toplar atıb.
Qeyd edək ki, tədbirdən əldə olunan bütün gəlir xüsusi qayğıya ehtiyacı olan uşaqların ehtiyaclarının qarşılanması məqsədilə xeyriyyə fondlarına yönləndirilib.
