Dövlət Statistika Komitəsinin məlumatına görə, 2024-cü ilin 11 ayında Azərbaycanda nikahların sayı azalıb, boşanmalarda isə heç bir dəyişiklik olmayıb. Ədliyyə Nazirliyinin rayon (şəhər) qeydiyyat şöbələri tərəfindən 46 146 nikah və 19 597 boşanma halı qeydə alınıb. Bu göstəricilər 2023-cü ilin eyni dövrü ilə müqayisədə, əhalinin hər 1 000 nəfərinə nikahların sayının 5,3-dən 4,9-a düşdüyünü, boşanmaların isə 2,1 səviyyəsində qalaraq dəyişmədiyini göstərir.
Nikahların sayının azalması və boşanmalarda dəyişiklik olmaması bir neçə amillə əlaqəsi mümkündür. Son illərdə işsizlik, qiymət artımları və maddi çətinliklər cütlüklərin nikah qurma qərarına təsir edə bilər. Cəmiyyətin ailə və evliliyə yanaşmaları da dəyişir.
Bəs görəsən, gənclər həqiqətənmi evlilikdən çəkinirlər? Nikaha girənlərin sayı niyə azalıb?
Mövzu ilə bağlı Bakuplus.az-a açıqlama verən psixoloq Aytən Ələkbərovanın sözlərinə görə, gənc qızlarımız öz yox, rəfiqəsinin ağlı ilə hərəkət edirlər:
“Bu gün həqiqətən də nikaha girən şəxslərin sayı azalıb. Qızlarda əsas problem düşüncələrinin və öhdəliklərinin çox olması, onları bir neçə şəxslərin idarə etməsidir. Anadan və bacıdan çox rəfiqə faktorları var. Rəfiqənin müdaxiləsi nəticəsində qarşısına çıxan adama yox deyir. Öz ağlını kənara qoyub, rəfiqəsinin ağlı ilə hərəkət edir. Təbii ki, burada evlilikdən söz açıla bilməz. Cütlüklər arasında artıq xaos yaranır”.
A.Ələkbərova qeyd edib ki, boşanmanın ən böyük səbəbi cütlüklərin 90 faiz yaxşı münasibəti kənara qoyub, 10 faiz neqativi ön plana çıxarmalarıdır:
“Həmin insanı itirməyə doğru addımlar atırlar. Oksitosin hormonu aşağı düşdükdə serotonin hormonuna təsir edir, təbii ki, burada nifrət, kin və mənfi emosiyaları qarşı tərəfə ötürürük. Sonunda da qarşı tərəfdən sərt cavab alırlar”.
“Nə olursan ol, sadəcə özün ol. Onda uğurun, şansın daha çox olacaq”, – deyə A.Ələkbərova fikrini tamamlayıb.
Nəzrin Vahid
