Azərbaycan Ordusunun 2020-ci il sentyabrın 27-də başladığı əks-hücum əməliyyatı nəticəsində, noyabrın 6-da bir sıra yaşayış məntəqələri işğaldan azad edilib.
Vətən müharibəsinin 41-ci günündə döyüşlər Ağdərə, Ağdam, Xocavənd və Qubadlı istiqamətlərində müxtəlif intensivlikdə davam edib. Ordumuz düşməni bəzi bölgələrdə canlı qüvvə və texnika itkisi ilə geri çəkilməyə məcbur edib. Qubadlı istiqamətində düşmən mövqelərini ataraq qaçıb, onların minaatan atış nöqtələri və döyüş mövqeləri zərbələrə məruz qalıb.
Müdafiə Nazirliyi Füzuli rayonunun işğaldan azad edilən kəndlərinin görüntülərini yayımlayıb. Düşmənin komandir heyəti və bir rabitə avtomobili, sursatla dolu iki “KamAZ”, qoşqusunda top olan üç “Ural” maşını və digər hərbi sursat məhv edilib.
Baş Prokurorluğun məlumatına görə, Ermənistanın təxribatları nəticəsində sentyabrın 27-dən noyabrın 6-dək 92 mülki şəxs həlak olub, 404 nəfər yaralanıb, 3064 ev, 100 yaşayış binası və 504 mülki obyekt zərər görüb.
