Qazaxıstanda qəzaya uğrayaraq 38 nəfərin həyatını itirdiyi Azərbaycan Hava Yollarına məxsus təyyarənin üç gün əvvəl Bakı-Trabzon reysini yerinə yetirərkən Trabzon Hava Limanına ilk cəhddə eniş edə bilmədiyi və ikinci cəhddə uğurlu eniş etdiyi məlum olub.
Euronews bu barədə məlumat yayıb.
Trabzon insidenti qəzadan xəbər verirdimi?
[caption id="attachment_211896" align="alignnone" width="696"]
Foto Euronews[/caption]
22 dekabr tarixində Bakı-Trabzon reysi ilə uçan Embraer E190AR tipli təyyarənin radar qeydlərinə əsasən, hava limanına yaxınlaşarkən pisti keçdiyi, lakin ikinci cəhddə uğurla eniş etdiyi təsbit edilib. Aviasiyada normal sayılan belə hallar adətən hava şəraiti, pistin vəziyyəti və ya texniki problemlərlə bağlı olur. Lakin bunun Qazaxıstandakı qəzaya öncədən işarə olub-olmadığı hələ dəqiq deyil.
Rusiyanın açıqlaması: Qəzaya quşlarla toqquşma səbəb olub
[caption id="attachment_211897" align="alignnone" width="696"]
Foto açıq mənbədən[/caption]
Rus mətbuatının məlumatına görə, təyyarə Bakıdan Çeçenistanın paytaxtı Qroznıya doğru uçurdu, lakin Qroznıda duman səbəbindən marşrutunu dəyişdi. Hava yolları şirkəti təyyarənin quş sürüsü ilə toqquşduğunu və Aktau şəhərindən təxminən 3 kilometr məsafədə təcili eniş etməyə çalışdığını bildirib.
Flightradar: Təyyarə GPS siqnal qarışdırıcılarına məruz qalıb
[caption id="attachment_211898" align="alignnone" width="696"]
Foto açıq mənbədən[/caption]
Qlobal uçuş izləmə tətbiqi Flightradar açıqlayıb ki, qəza baş verən təyyarə Azərbaycan Hava Yollarına məxsus Embraer ERJ-190 modelidir. Sosial şəbəkələrdə verilən açıqlamada təyyarənin güclü GPS siqnal qarışdırıcılarına məruz qaldığı və bunun yanlış ADS-B məlumatlarının ötürülməsinə səbəb olduğu bildirilib.
Rəsmi məlumatlar: 38 nəfər həyatını itirib
Qazaxıstanın Fövqəladə Hallar Nazirliyi bildirib ki, Azərbaycan Hava Yollarına məxsus 8432 saylı reys Aktau şəhəri yaxınlığında qəzaya uğrayıb. Yerli mətbuatın məlumatına görə, təyyarədə 62 sərnişin və 5 ekipaj üzvü olmaqla ümumilikdə 67 nəfər olub. Qazaxıstanın Baş nazir müavini Kanat Bozumbayev 38 nəfərin həyatını itirdiyini təsdiqləyib.
