Bildiyimiz kimi, noyabrın 15-dən, yəni, sabahdan etibarən Azərbaycanda istilik mövsümü başlayacaq.
İstilik mövsümünün başlamasıyla “Azəristilik” ASC-nin balansında olan qazanxanalar işə salınacaq.
Bəs qazanxanalarda bu mövsümə hazırlıq çərçivəsində hansı işlər görülüb? Bütün qazanxanalara tam baxış keçirilib?
Məsələ ilə bağlı “Azəristilik” ASC-nin mətbuat xidmətinin rəhbəri Elvin Basqallı açıqlamasında qeyd edib ki, istilik mövsümünə hazırlıq çərçivəsində 557 qazanxana, 88 istilik məntəqəsi tam hazır vəziyyətdədir.
“9 min metrdən çox magistral və məhəllədaxili xətlər sınaqdan keçirilib, təmir olunaraq yenilənib. Bütün işlər görülüb, qurğular, avadanlıqlar saz vəziyyətə gətirilib, sızıntı olan yerlər təmir olunub. Artıq sabahdan istilik veriləcək”, - deyə Elvin Basqallı bildirib.
Qeyd edək ki, istilik mövsümü aprelin 15-nə qədər davam edəcək.
