Sabirabadda bıçaqlanma hadisəsi baş verib.
İnsanoid.com-un əldə etdiyi məlumata görə, hadisənin istintaqı Lənkəran Ağır Cinayətlər Məhkəməsində keçirilib.
Belə ki, təqsirləndirilən Nicat Qaraşov (ad şərtidir) 2006-cı ildə Bərdə şəhərində anadan olub. O, epilepsiya mənşəli üzvi şəxsiyyət pozuntusundan əziyyət çəkib. Bu xəstəlik səbəbindən anlaqsız vəziyyətdə olaraq Sabirabad rayonunda cinayət törədib. O, Əlövsət Cəlilovun (ad şərtidir) ona qarşı nalayiq ifadələr işlətdiyini əsas gətirərək onu bıçaqlayıb.
Nicat Qaraşov Azərbaycan Respublikası CM-nin 126.1-ci (qəsdən sağlamlığa ağır zərbə vurma) maddəsi ilə təqsirləndirilib.
Məhkəmədə təqsirləndirilən şəxs qismində dindirilən Nicat Qaraşov ona qarşı irəli sürülən ittiham üzrə özünü təqsirli bilərək hadisəni xatırlamadığını vurğulayıb.
Məhkəmədə zərərçəkmiş Əlövsət Cəlilov ifadə verib:
“Hadisədən 3-4 ay əvvəl Nicat anası ilə Sabirabad rayonu, Güdəcühür qəsəbəsinə köçərək burada yaşamağa başladı. Biz uşaqlarla domino oynayanda o da yanımıza gəlirdi. Nicatın danışığında kobudluq hiss edirdim, bir neçə dəfə ona “buradan get” dedim. O da həmişə çıxıb gedib. Hadisə günü biz yenə domino oynayırdıq. Nicat gəlib məişət məsələsi ilə bağlı kömək istədi amma heç kim ona köməklik göstərmədi. Buna görə o, nalayiq ifadələr işlətməyə başladı. Nicata “çıx get burdan, o nə sözdü işlədirsən!” dedim. Bu sözümə cavab olaraq məni də söyməyə başladı. Ona doğru gedəndə Nicat yerdə daş götürüb mənə atdı. Sonra yerə yıxıldı və ürəyi getdi. Onu ayıldıb evinə göndərdik.
Hadisədən bir neçə dəqiqə sonra Nicatın anası ilə gəldiyini görüb ayağa qalxdım. Yanımıza çatanda anası “uşaqla nə işiniz var?” deyə soruşdu. Onunla işimizin olmadığını dedim. Daha sonra Nicatın anası başı ilə oğluna işarə etdi. Bu zaman Nicat mənə bıçaq zərbəsi endirdi. Lakin bıçaqlandığımı əvvəlcə hiss etmədim. Onun əlində bıçağı gördükdən sonra bıçaqlandığımı başa düşdüm. Nicat məni orada bıçaqlamağa cürət edə bilməzdi. Lakin evdə öyrədilib gətirildiyi üçün bu yola əl atıb. Yəqin ki, anası ona deyib ki, “get, mən də səninlə gələcəm, fürsət olan kimi sənə işarə edəndə bıçaqlayarsan”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Nicat Qaraşovun hadisəni anlaqsız törətdiyi müəyyən edilib. İctimai təhlükəli əməli törətdiyi zaman anlaqsız vəziyyətdə olduğuna görə cinayət məsuliyyətindən və cəzadan azad edilib.
Fidan İlqar
