Rəşad Saləddin oğlu Atakişiyev 7 yanvar 1985-ci ildə Şəmkir rayonunun Qılıncbəyli kəndində anadan olub.
O, Şöhrət Hüseynov adına Qılıncbəyli kənd tam orta məktəbində, sonra isə Samux rayonunun Alabaşlı kənd orta məktəbində təhsil alıb. Rəşad Atakişiyev 2002-ci ildə Azərbaycan Ali Hərbi Təyyarəçilik məktəbinə daxil olub və 2006-cı ildə oranı bitirib.
Atakişiyev 2001-ci ildən pilot kimi fəaliyyətə başlayıb və polkovnik-leytenant rütbəsinə qədər yüksəlib. O, qısa zaman ərzində hərbi hissə komandirinin müavini vəzifəsinə yüksəlib. Pilot Azərbaycan və Türkiyə Hərbi Hava Qüvvələrinin “Turaz Qartalı” devizi altında keçirilən taktiki-uçuş təlimlərində iştirak edib.
24 iyul 2019-cu ildə, saat 22:00 radələrində gecə vaxtı təlim uçuşları zamanı Rəşad Atakişiyevin idarə etdiyi MiQ-29 təyyarəsi Xəzər dənizinə düşüb.
Qəza nəticəsində polkovnik-leytenant Rəşad Atakişiyev itkin düşüb. Pilotun və təyyarənin axtarışları üçün Türkiyə və Rusiyadan mütəxəssis və avadanlıqlar cəlb olunub.
19 avqust Azərbaycan Müdafiə Nazirliyinin verdiyi məlumata görə təyyarənin qara qutusu tapılıb. 20 avqust tarixində isə pilotun nəşi tapılıb.
21 avqust 2019-cu ildə Rəşad Atakişiyev II Fəxri xiyabanda dəfn edilib. 7 may 2021-ci ildə hərbi pilota Şəhid statusu verilib.
