Gəncə-Daşkəsən Regional Təhsil İdarəsi İsmət Qayıbov adına 1 nömrəli tam orta məktəbdə aparılan araşdırma nəticəsində bir sıra nöqsanlar aşkarlayıb.
İnsanoid.com xəbər verir ki, bu səbəbdən məktəbin direktoruna sonuncu xəbərdarlıqla şiddətli töhmət verilib.
Valideyn və vətəndaşların şikayətləri əsasında aparılan yoxlamalar zamanı təhsil müəssisəsində tədris prosesində qanun pozuntuları müəyyən olunub. Sosial şəbəkələrdə yayılan səs yazısında valideynlərdən əlavə vəsait tələb edilməsi ilə bağlı iddialar da təsdiqini tapıb.
Təhsil İdarəsi valideynlərdən məcburi şəkildə vəsait toplanmasının yolverilməz olduğunu bildirərək, təhsil müəssisələrində şəffaflığın təmin edilməsi üçün mütəmadi yoxlamaların davam etdiriləcəyini vurğulayıb.
Direktor Gülbəniz Bayramova bu ilin mart ayında sözügedən məktəbə direktor təyin edilib. Gülbəniz Bayramova Gəncə Dövlət Universitetinin Filologiya fakültəsinin Azərbaycan dili və ədəbiyyatı ixtisasını bitirib, 2004-cü ildən yeni təyinata qədər Mehdi Mehdizadə adına 4 nömrəli xarici dillər təmayüllü məktəb-liseydə Azərbaycan dili və Ədəbiyyat fənnini tədris edib.
View this post on Instagram
