Qazaxıstan Prezidenti Kasım-Jomart Tokayev Aktau yaxınlığında baş vermiş təyyarə qəzası ilə bağlı xüsusi müşavirə keçirib.
İnsanoid.com xəbər verir ki, bu barədə Qazaxıstan mətbuatı məlumat yayıb.
Tokayev həlak olanların ailələrinə bir daha başsağlığı verib və qəza nəticəsində qurbanlar arasında Qazaxıstan vətəndaşlarının da olduğunu xatırladıb. Prezident qeyd edib ki, qəza zamanı fövqəladə xidmətlər operativ və təşkilatlanmış şəkildə fəaliyyət göstəriblər.
"Biz daha ciddi nəticələrin qarşısını ala bildik və çox sayda insanın həyatını xilas etdik. Xilasetmə işləri yüksək səviyyədə həyata keçirildi və ictimaiyyət hadisə barədə vaxtında məlumatlandırıldı. Vətəndaşlarımız zərərçəkənlərə yardım göstərmək üçün böyük həmrəylik nümayiş etdirdi, qan vermək üçün növbəyə durdular. Bir çox insan Azərbaycanın səfirliyi qarşısına gül qoydu. Bu insani reaksiya həm yerli, həm də beynəlxalq mediada geniş işıqlandırıldı. Xilasedicilərimizin, həkimlərimizin və könüllülərimizin fədakar işi bütün dünya tərəfindən izlənildi. Xüsusi minnətdarlıq qonşu dost ölkələrin - Azərbaycanın, Rusiyanın və Qırğızıstanın vətəndaşlarından gəldi," - deyə Tokayev bildirib.
Qəzaya dair araşdırmalar və zərərçəkənlərə yardım tədbirləri davam edir.
