Son dövrlər insanlara bütün sahələr üzrə çoxlu seçim şansı təqdim edilir. Seçimlərin çox olduğu dövrdə isə düzgününü, yaxşısını tapmaq müşkül məsələyə çevrilir. Amma təbii ki, seçimlər çox olsa da, öz stili ilə fərqlənən şəxslər bir addım önə keçir.
Belə insanlardan biri də “Vüsal stili” ilə məşhurlaşan masallılı Vüsal İbrahimovdur.
Cenublu.az onunla müsahibəni təqdim edir:
– Vüsal bəy, öncə oxucularımız üçün özünüzü təqdim edin.
– Vüsal İbrahimov Cavanşir oğlu. 1984-cü il oktyabrın 2-də Xırdalan şəhərində anadan olmuşam. Əslim Masallıdandı.
– Neçə ildir bərbər kimi fəaliyyət göstərirsiniz?
– 2005-ci ildən bərbər kimi fəaliyyətdəyəm, amma 2007-ci ildən bu sənətin bütün xırdalıqlarını öyrəndim. Üç dövlətdə işləmişəm: Almaniya, Rusiya və Türkiyə.
– Bərbər olmağa necə qərar verdiniz?
– Etiraf edim ki, mən futbolçu olmuşam. Həm “Neftçi”nin U-16 komandasında, həm də Azərbaycan U-16 yığmasının tərkibində oynamışam. Atam rəhmətə getdi, elə bir vəziyyət yarandı ki, futbolda qala bilmədim.
Öz qərarımla bərbər olmağı seçdim. Bu sahəni öyrəndim, əsgərliyə yollandım. Qayıtdıqdan sonra Avropaya getdim. Orda çalışdım. 25 yaşımda ölkəyə qayıtdım və işləməyə başladım. Artıq 23 ildir ki, bu sahədəyəm və şükürlər olsun ki, tanıyanlar çoxdur.
– Ailənizdə bu sənətdə olan varmı?
– Öz ailəmdə yox. Amma babamın atası Masallıda tanınmış bərbər olub. Bundan başqa babamın xalası uşaqları da bərbər kimi işləyiblər. İndi də mən bərbərəm və gələcəkdə övladımın da bu sahəni davam etdirməsini istəyirəm.
– Şagirdləriniz varmı? Varsa, onlara “Vüsal stili”ni öyrədirsinizmi?
– Şagirdlərim var. Əlbəttə, onlara da öyrədirəm. Elə tələbələrin ən çox öyrənmək istədiyi stil odur. Deyirlər ki, ustamızın stilini öyrənirik.
– Hazırda saç ustası seçimi çoxdur. Amma siz öz mövqeyinizlə müştəri cəlb etməyi, izləyici yığmağı bacardınız. Bu “Vüsal stili” ideyası necə yaranıb?
– “Vüsal stili” adlanan saç düzümünü 2008-2009-cu ildən düzəldirəm. O zamanlar bu stilin adı “poluboks” idi. Sadəcə son dövrlər özümə məxsus olduğu, “Vüsal stili” adlandığı üçün məşhurlaşdı. Bütün dünya bu stildən danışır. Düzdü, əvvəl də düzəldirdim bu saçı, sadəcə son 3-4 aydır ki, gündəmdən düşmür.
İzləyici yığmağımın digər bir səbəbi isə heç kimdən hansısa saç stilini kopyalamamağımdı. Öz stilim var və sonacan da belə davam edəcəm.
– Paylaşdığınız videolarda fon olaraq ancaq Xumar Qədimovanın mahnıları səslənir. Deyəsən, Xumar Qədimovaya xüsusi bir sevginiz var?
– Bəli, çox xoşlayıram. Xumar xanımın mahnıları mənə xüsusi bir rahatlıq verir. İşlədiyim zaman ancaq onun ifalarını dinləyirəm. Bunu Xumar Qədimovanın özü də bilir. Mənimlə görüşmək istəyir. İnşallah, yaxın zamanda görüşümüz baş tutacaq.
Fidan İlqar
