Bərdədə arvad ərini xəyanətə görə bıçaqlayıb.
İnsanoid.com-un əldə etdiyi məlumata görə, hadisənin istintaqı Gəncə Ağır Cinayətlər Məhkəməsində keçirilib.
Belə ki, təqsirləndirilən Vəfa Səfərova (ad şərtidir) 1991-ci ildə Bərdə rayonunda anadan olub. O, əri Tərlan Səfərovla (ad şərtidir) birlikdə Bərdə şəhəri, Təzə Məhəllələr adlanan ərazidə kirayə mənzildə yaşayıb. Bir gün Vəfa həyat yoldaşının telefonunda başqa qadınlarla danışdığını, üstəlik söhbət zamanı onun ləyaqətini alçaldacaq sözlər işlətdiyinin şahidi olub. Bundan hiddətlənib Tərlanı yuxudan oyadıb, etdiyi xoşagəlməz hərəkətlərə görə izah tələb edərkən aralarında mübahisə yaranıb. Yaranmış mübahisə zamanı əri Vəfaya qarşı nalayiq sözlər işlədərək, sillə vurub. Buna görə qadın şüşə sürahi ilə qəsdən yoldaşının başına vurub. Daha sonra bıçaqla boyun, kürək və döş qəfəsinə 3 dəfə zərbə endirib.
Nəticədə Vəfa Səfərova Azərbaycan Respublikası CM-nin 126.1-ci (qəsdən sağlamlığa ağır zərbə vurma) maddəsi ilə təqsirləndirilib.
Məhkəmədə təqsirləndirilən şəxs qismində dindirilən Vəfa Səfərova ona qarşı irəli sürülən ittiham üzrə özünü təqsirli bilib:
“Hadisədən iki gün əvvəl Tərlanın “TikTok”da “Canavar Qız” adlı istifadəçiyə sevgi məzmunlu video göndərdiyini gördüm. Kimliyini soruşanda əmisi qızı olduğunu desə də, xəyanət etdiyini anladım. Bir neçə dəqiqə sonra aramızda bu məsələ barədə mübahisə yarandı. Bu zaman Tərlan qəndqabını başıma atdı, amma mənə dəymədi. Səhəri gün “Canavar Qız” adlı istifadəçiyə öz telefonumla yazdım. Tərlanı tanımadığını deyib, məni qara siyahıya atdı.
Bir gün sonra böyük oğlumun mobil telefonu ilə həmin qızın “TikTok” profilinə baxdım. Canlı yayım açdığını görüb, daxil oldum. Ailəmi dağıtmamasını, ərimdən uzaq durmasını dedim”.
Qadın ifadəsində göstərib ki, ərinin telefonunda “Canavar Qız”a onun haqqında nalayiq sözlər yazdığını görüb:
“Yazışmalarda həmin qadın ərimə mənim onu narahat etdiyimi və qarşısını almasa, polisə şikayət edəcəyini bildirib. Ardınca mobil telefonun videolar olan bölməsinə daxil olduqda Tərlanla “Canavar Qız”ın əxlaqsız görüntülərini tapdım. Elədiklərinin izahını soruşanda mübahisəmiz yarandı. Mənə qarşı söyüşlü sözlər işlətdiyi üçün sürahini onun başına vurub, bıçaqladım.
Tərlan mənə dəfələrlə xəyanət edib. Amma ailəm dağılmaması üçün bağışlamışam. İndi də əməlimdən peşmanam”.
Daha sonra zərərçəkmiş Tərlan Səfərov qarşı tərəf arvadı olduğu üçün ifadə verməkdən imtina edib. Onun məhkəməyədək icraat zamanı verdiyi ifadəsi elan edilib:
“2019-cu ildə Vəfa ilə ailə həyatı qurduq. Bir müddət sonra münasibətimiz pozulmağa başladı və təxminən 1 il sonra rəsmi qaydada boşandıq. Vəfa məni sevdiyi üçün boşanandan sonra ayrı qala bilmədi və yenidən barışmağa cəhd göstərdi. Onun təkidi ilə 2021-ci ildə yenidən rəsmi nikaha daxil olduq. İkinci dəfə nikahdan sonra da münasibətimiz normal olmadı. Arvadımın dır-dır etməsindən və giley-güzarından bezmişdim. Hadisə günü yatmışdım, Vəfa gəlib məni oyatdı. Həmin vaxt “niyə mənə xəyanət etmisən? Məni niyə o pozğuna satdın?” deyə qışqırmağa başladı. Yuxudan ayıldığım üçün əsəbiləşib onu təhqir etdim və sifətinə sillə vurdum. Bu zaman Vəfa sürahini başıma vurub, ardınca məni bıçaqladı”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Vəfa Səfərova 3 il müddətində azadlıqdan məhrum edilib.
Fidan İlqar
