Yevlaxda kişi narkotik maddənin təsiri altında qətl törədib.
İnsanoid.com-un əldə etdiyi məlumata görə, hadisənin məhkəmə istintaqı Şəki Ağır Cinayətlər Məhkəməsində hakim Rəfail Ağayevin sədrliyi ilə aparılıb.
Belə ki, 1986-cı il təvəllüdlü Həsrət Bəkirov Yevlax şəhərində anadan olub. O, əvvəllər də narkotik vasitələrin satışına və istifadəsinə görə məhkumluq həyatı yaşayıb. Ötən il martın 2-də ailəsi ilə birlikdə yaşadığı evə gedərək yataq otağında psixotrop maddə metamfetamin qəbul edib. Narkotik maddənin təsiri altında arvadı Laləzar Bəkirovanın ona xəyanət etməsindən şübhələnib. Arvadını yanına çağıraraq, xəyanətinin səbəbini soruşub. Laləzar Bəkirova bir neçə dəfə ona xəyanət etdiyini və həmin şəxslərin ondan üstün olduğunu bildirib. Bunu özünə təhqir kimi qəbul edən Həsrət onu öldürmək qərarına gəlib. İki əli ilə qadının başından tutaraq otağın pəncərəsinə vurub. Laləzarın başı ilə şüşəni sındırdıqdan sonra yerə yıxıb. Tökülən şüşə parçaları ilə arvadının bədəninə 17 dəfə zərbə endirib. Nəticədə Laləzar Bəkirova zərbələrdən sonra qanitirmədən ölüb.
Həsrət Bəkirov Azərbaycan Respublikası CM-nin 120.2.4-cü maddəsi ilə təqsirləndirilib.
Məhkəmədə təqsirləndirilən şəxs qismində dindirilən Həsrət Bəkirov ifadə verməkdən imtina edib. O, ittiham üzrə özünü qismən təqsirli bilib. Onun ibtidai istintaqdakı ifadəsi məhkəmə zalında elan olunub:
“Laləzar Bəkirova mənim həyat yoldaşımdır. 6 övladımız var. Narkotik vasitələrdən istifadə edirəm. Əvvəllər CM-in müxtəlif maddələri ilə məhkum olunmuşam. 2023-cü ilin oktyabr ayında həbsdən çıxdım. Həmin gün Salyandan Bakıya gəldim. Çünki arvadım uşaqlarımla birlikdə Bakıda kirayədə qalırdı. Laləzarla metronun 20 Yanvar stansiyası tərəfdə idik və bu zaman qarşıdan gələn tanımadığım oğlan bizi görüb qaçdı. Elə bu vaxt başqa tanımadığım bir neçə nəfər aralarında danışarkən Laləzarın qaçan oğlanla münasibətinin olduğunu dedilər. Bunu eşitdiyim üçün onlara yaxınlaşdım. Nə baş verdiyini soruşanda dedilər ki, arvadımın həmin oğlanla münasibəti var. Həyat yoldaşımdan bunu soruşanda inkar etdi.
Hadisədən 3-4 gün əvvəl Laləzar ilə Yevlax bazarında idik. Bakıda bizi görən oğlan da orada idi. Bizi görən kimi çıxıb getdi. Hadisə günü həyat yoldaşımla aramızda mübahisə başladı. O, fərqli-fərqli tanımadığım şəxslərin məndən daha yaraşıqlı olduğunu deyib, məni qəzəbləndirdi. Yataq otağına gedəndə Laləzarın cibindən metamfetamin tapdım. Bunun kimə məxsus olduğunu soruşanda bilmədiyini dedi. Həmin maddənin arvadımın sevgilisinə məxsus olduğunu düşündüm.
Daha sonra Laləzardan xəyanətinin səbəbini soruşdum. O isə bir neçə dəfə başqa şəxslərlə mənə xəyanət etdiyini, o kişilərin məndən üstün olduğunu deyib, nalayiq ifadələr işlətməyə başladı. Bundan sonra əsəbiləşib başından tutaraq otağın pəncərəsinin şüşəsinə çırpdım”.
Məhkəmə istintaqı zamanı zərərçəkmiş şəxsin hüquqi varisi qismində anası ifadə verib:
“Laləzar 2008-ci ildə 18 yaşı olarkən Həsrətlə ailə həyatı qurdu. Bu evlilikdən 6 övlad sahibi oldular. Həsrət narkotik vasitələrdən istifadə edirdi. Bir neçə dəfə məhkum olunub. Onlar arasında mütəmadi olaraq mübahisələr olurdu. Mübahisə vaxtı Həsrət Laləzarı döyüb, ödürməklə hədələyib. Mübahisələrin səbəbi isə kürəkənimin qızımı müxtəlif bəhanələrlə qısqanması olub.
Martın 1-i Laləzar mənə zəng edib Həsrətin onu öldürməklə hədələdiyini dedi. Qızımın qayınanası ilə danışanda mübahisənin bitdiyini bildirdi. Səhəri gün qardaşım oğlu Zaur zəng edərək Həsrətin Laləzarı öldürdüyünü dedi”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Bəkirov 17 il 6 ay müddətində azadlıqdan məhrum edilib.
Fidan İlqar
