29 il əvvəl törədilən ağır cinayətin üstü açılıb. Bu barədə oktyabrın 31-də Baş Prokurorluqdan məlumat verilib.
Belə ki, 1993-cü il 26 noyabr tarixində Fikrət İbrahimov yaşadığı evdə odlu silahdan açılmış atəş nəticəsində ölüb. İstintaq aparılsa da, cinayəti törətmiş şəxsi müəyyən etmək mümkün olmadığından iş üzrə icraat dayandırılmışdır.
Nərimanov rayon prokurorluğu tərəfindən cinayət işi yenidən öyrənildikdən sonra iş üzrə icraat təzələnmişdir.
Məlum olub ki, zərərçəkmişi iş yoldaşı olmuş Nazim Bayramov aralarında yaranmış narazılığa görə qətlə yetirib. O, Fikrət İbrahimovun evinə gedib, onunla mübahisə edərkən zərərçəkmişin tapançasını əlindən alıb, baş nahiyəsinə atəş açıb.
Hazırda cinayət işi üzrə istintaq tədbirləri davam etdirilir.
