Türkiyənin İzmir şəhərinin Menderes və Seferihisar rayonlarında güclü meşə yanğınları artıq bir neçə gündür ki, davam edir.
Insanoid.com saytının hadisə yerində olan əməkdaşının verdiyi məlumata görə, alovun söndürülməsi üçün əraziyə 4 təyyarə, 14 helikopter, 106 yanğınsöndürən texnika və yüzlərlə iş maşını cəlb olunub.
Güclü külək yanğının qarşısının alınmasını çətinləşdirir. Ərazidə yanğınsöndürmə işləri fasiləsiz olaraq davam etdirilir. Havanın küləkli və dəyişkən olması səbəbindən alovun istiqaməti tez-tez dəyişir, bu da mübarizəni daha da mürəkkəbləşdirir.
Mövzu ilə bağlı açıqlama verən Türkiyənin Kənd və Meşə Təsərrüfatı naziri İbrahim Yumaklı bildirib ki, ehtiyat tədbiri olaraq 5 kənd və 2 məhəllə təxliyə edilib. Nazir əlavə edib ki, hazırda sağlamlıq problemi yaşayan şəxs yoxdur:
"Təəssüf ki, güclü külək işlərimizi çətinləşdirir. Gün ərzində küləyin sürəti əsasən 100 kilometrdən yuxarı olub. Küləyin istiqamətinin dəyişkənliyi səbəbilə qurduğumuz müdafiə xətləri tez-tez pozulur və yenidən qurulmalı olur. Bu da yanğınla mübarizəni uzadır.”
Qeyd edək ki, axşam saatlarından başlayaraq alov Doğanbəy Atatürk Məhəlləsində yerləşən evlərə yaxınlaşıb.
AFAD və jandarma əməkdaşları tərəfindən səsli anonslar və fit səsləri ilə xəbərdar edilən sakinlər qorxu və təşviş içində evlərini tərk ediblər. Avtomobillərinə minən sakinlər məhəllədən çıxışda demək olar ki, konvoy təşkil ediblər. Jandarma əməkdaşları və yerli sakinlər təhlükəsiz keçidi təmin ediblər. Digər tərəfdən, HARK – İnsan və heyvanların axtarış-xilasetmə qrupları evlərdə qalan heyvanları da xilas ediblər. Alovlar yaşayış məntəqələrinə qədər daxil olub. Atatürk, Cümhuriyyət, Orhanlı, Payamlı və Kavakdərə məhəllələri təxliyə edilib.
Yanğınla mübarizə tədbirləri davam etdirilir.
[gallery size="full" ids="225122,225123,225124,225125,225126,225127,225128"]
