Şamaxıda qaçırdıqları avtomobillə yol-nəqliyyat hadisəsi törədən iki yeniyetmə
saxlanılıb. Bu barədə 21 dekabr tarixində Daxili İşlər Nazirliyi İnsanoid-ə məlumat verib.
Belə ki, ötən gün gecə saatlarında Şamaxı şəhər sakininə məxsus “VAZ-2106” markalı avtomobilin sahibinin yaşadığı evin qarşısından naməlum şəxslər tərəfindən qaçırılması ilə bağlı rayon polis şöbəsinə məlumat daxil olub.
Nəqliyyat vasitəsini qaçırmaqda şübhəli bilinən iki yeniyetmə saxlanılıb. Onlar avtomobili qanunsuz olaraq ələ keçirdikdən sonra rayonun Əngəxəran kəndi istiqamətində yol-nəqliyyat hadisəsi törədiblər.
Hadisə nəticəsində hər ikisi müxtəlif dərəcəli bədən xəsarətləri alsalar da, nəqliyyat vasitəsini tərk edərək oradan uzaqlaşıblar. Daha sonra polis əməkdaşları tərəfindən həmin şəxslər tutularaq istintaqa təhvil veriliblər.
Faktla bağlı araşdırmalar aparılır.
