2020-ci ildə başlayan və Azərbaycanın Zəfəri ilə nəticələnən 44 günlük Vətən müharibəsinin başlanmasından 5 il ötür.
27 sentyabr 2020-ci ildə Ermənistanın hərbi təxribatlarına cavab olaraq Azərbaycan Ordusu əks-hücum əməliyyatlarına başladı. Bu müharibə nəticəsində Azərbaycan işğal altında olan Qarabağ və ətraf rayonlarını azad etdi.
Azərbaycanın tarixi zəfəri nəticəsində Füzuli, Cəbrayıl, Zəngilan, Qubadlı, Ağdam, Kəlbəcər, Laçın və Şuşa şəhərləri Ermənistanın 30 ilə yaxın davam edən işğalından azad edildi. Xüsusilə, Şuşa şəhərinin azad edilməsi strateji və mənəvi baxımdan böyük əhəmiyyət daşıyır. Şuşa, Azərbaycanın qədim mədəniyyət beşiyi və Qarabağın simvolu sayılır.
Müharibə nəticəsində Azərbaycan və Ermənistan arasında 10 noyabr 2020-ci ildə Rusiya Federasiyasının vasitəçiliyi ilə üçtərəfli atəşkəs razılaşması imzalandı. Bu razılaşmaya əsasən, Ermənistan qalan işğal olunmuş əraziləri təhvil verdi və regionda yeni siyasi reallıqlar yarandı.
Azad edilmiş torpaqların tarix boyu Azərbaycan mədəniyyətində və iqtisadiyyatında böyük rolu olub. Qarabağ bölgəsi, xüsusən də Şuşa, musiqi, memarlıq və sənət sahəsində mühüm mərkəzlərdən biri kimi tanınıb.
