Aktauda baş vermiş təyyarə qəzasından sağ çıxmış 48 yaşlı sərnişin hadisənin təfərrüatları ilə bölüşüb.
Bu barədə İnsanoid.com Zakon.kz-ya istinadən xəbər verir.
Onun sözlərinə görə, təyyarə bir neçə dəfə eniş etməyə cəhd edib, lakin bu, mümkün olmayıb. Sərnişinlər daha sonra güclü partlayış səsi eşidiblər və bundan sonra təyyarə dövrə vurmağa başlayıb.
"Pilotlara təşəkkür edirəm, onlar manevrləri ilə bizi xilas etdilər. Əgər onlar olmasaydı, hamımız ölə bilərdik. Quyruq hissəsi çox zədələnmişdi," – deyə Subxonqul bildirib.
Sərnişinin sözlərinə görə, yanında olanların hamısı sağ qalıb. Lakin bir çox sərnişin xəsarət alıb.
Hazırda Subxonqul güclü baş ağrılarından əziyyət çəkir, amma ciddi xəsarətlərdən qurtulub. O, Yekaterinburqda yaşayır və Bakıdan keçid edərək Groznıya gedirdi.
Məlumatlara görə, pilotlar daha böyük faciənin qarşısını alaraq təyyarəni Şapagatova kəndinin yaşayış evlərindən uzaqlaşdırıblar. Kəndə yalnız iki kilometr qalırdı, amma ekipaj təyyarəni başqa istiqamətə yönəldə bilib.
