Bu gün Gəncə Appelyasiya Məhkəməsində Şəmkir rayon İcra Hakimiyyətinin keçmiş başçısı Alimpaşa Məmmədovun appelyasiya şikayəti üzrə məhkəmə prosesi yekunlaşıb.
Gencexeber.az məlumat verir ki, Faiq Mahmudovun sədirliyi ilə keçirilən prosesdə dövlət ittihamçısı və A.Məmmədovun vəkilləri çıxış edib.
Təxminən 1 saata yaxın davam edən çıxışlardan sonra hakim hökmü elan edib.
Hökmə əsasən, appelyasiya şikayəti təmin edilib. Keçmiş icra başçısının cəzası 10 il 6 ay müddətinə endirilib. Həmçinin “ABAD Şəmkir” MMC dövlət tərəfindən müsadirə olunub.
Qeyd edək ki, Alimpaşa Məmmədova Gəncə Ağır Cinayətlər Məhkəməsi tərəfindən 11 il 6 ay həbs qərarı verilib.
Xatırladaq ki, 2014-cü ildən 2021-ci ilin aprel ayınadək Şəmkirin icra başçısı vəzifəsində çalışmış Alimpaşa Məmmədov Dövlət Təhlükəsizliyi Xidmətinin (DTX) icra hakimiyyətlərində keçirdiyi silsilə əməliyyatlar nəticəsində tutulmuşdu.
