Abşeron rayonu Masazır qəsəbəsində yerləşən 3 №-li tam orta məktəbdə şagirdlərin davranış və dərs nailiyyətlərinin sarı, qırmızı və yaşıl kartlarla qiymətləndirilməsi valideynlərin narazılığına səbəb olub.
Bu barədə Qafqazinfo.az-a bir qrup valideyn müraciət edib.
Onların sözlərinə görə, bu metod məktəb direktoru tərəfindən valideynlərə göndərilib: “Bəlkə də yaxşı tərəfləri var, ancaq uşaqların düşüncəsi ilə yanaşdıqda bu, onlarda psixoloji gərginlik və motivasiya itkisinə yol aça bilər. “Qırmızı kart” alan şagirdlər sinif yoldaşları qarşısında fərqləndirildiyi üçün özlərini təhqir olunmuş kimi hiss edir, nəticədə dərsə maraqları azalır.
Məsələn qırmızı vizual kart ən aşağı qiymətləndirmədir və üzərində bu sözlər yazılıb: “Sənin davranışın məktəb qaydalarına ciddi zidd olub. Bu kart intizam komissiyasında müzakirə olunacaq məsələdir. Unutma: səhv etmək insani haldır, amma onu təkrarlamamaq məsuliyyətli addımdır.”
Bundan sonra valideynin həmin kartı imzalaması üçün xana var. Axı bu metod uşaqlar arasında xüsusən ibtidai sinif mərhələsində özünəinamın zəifləməsinə və sosial təcrid hissinə səbəb ola bilər!”
.jpg)
Məsələ ilə bağlı Abşeron-Xızı Regional Təhsil İdarəsinə sorğu ünvanladıq. Qurumdan müraciətimizə cavab olaraq bildirildi ki, ümumi təhsil müəssisəsinin daxili intizam qaydaları pedaqoji şurada müzakirə edildikdən sonra müəssisə rəhbərinin əmri ilə təsdiq edilir, həm şagirdlər, həm də valideynlər intizam qaydaları ilə tanış edilir: “Bir çox təhsil müəssisəsində ötən iki ildə tətbiq edilmiş “virtual kart”lar hazırda demək olar ki, bütün təhsil müəssisələrinin intizam qaydalarında təsbit edilib. Burada məqsəd şagirdlərdə intizam, sosial məsuliyyət, davranış mədəniyyəti formalaşdırılmasına dəstək vermək, məktəbdə sağlam mühit formalaşdırmaqdır. Tətbiq olunan virtual sarı və qırmızı kartlar cəza vasitəsi deyil — bu mexanizm intizam pozuntularının qeydiyyatı, təhlili və şagirdlərə vaxtında pedaqoji-psixoloji dəstəyin göstərilməsi üçün nəzərdə tutulub.
Şagird İntizam qaydalarına əsasən:
Sarı kart – xəbərdarlıq xarakteri daşıyır və davranışın korreksiyasına yönəlib;
Qırmızı kart – təkrarlanan və ciddi intizam pozuntuları zamanı tətbiq olunur;
Yaşıl kart – müsbət davranış və nailiyyətləri stimullaşdırmaq məqsədilə verilir.
Virtual kartların tətbiqi şagirdlərin davranışlarını izləməyə, vaxtında fərdi və psixoloji dəstək göstərməyə, eləcə də təhsilalanlarda müsbət davranış vərdişlərini möhkəmləndirməyə imkan yaradır.
Valideynləri övladlarının təhsil aldığı məktəbdə virtual kartların tətbiqi mexanizmi ilə yaxından tanış olmağa, təşəbbüsü dəstəkləməyə dəvət edirik”.
[gallery link="file" size="full" ids="229540,229541,229542"]
