Səhiyyə Nazirliyində tabelikdə olan elmi-tədqiqat institutları və mərkəzlərinin rəhbərlərinin iştirakı ilə 2024-cü ilin yekunlarına və növbəti ildə həyata keçiriləcək tədbirlərə həsr olunan iclas keçirilib.
Bu barədə İnsanoid.com Nazirliyə istinadən xəbər verir.
İclasda giriş sözü ilə çıxış edən səhiyyə naziri Teymur Musayev səhiyyə sisteminin inkişafının ölkəmizdə prioritet məsələlərdən olduğunu vurğulayıb: “Cari ildə Səhiyyə Nazirliyi tərəfindən respublikamızda səhiyyə infrastrukturunun daha da möhkəmləndirilməsi, göstərilən xidmət səviyyəsinin artırılması, bu sahənin maddi-texniki bazasının, kadr potensialının gücləndirilməsi və rəqəmsallaşdırma işlərinin genişləndirilməsi istiqamətində bir sıra zəruri addımların atılıb. Prezident İlham Əliyevin müvafiq tapşırığına əsasən ölkə səhiyyəsinin müasir tendensiyalara cavab verməsi və əhalinin tibb xidmətlərindən məmnunluq səviyyəsinin və əlçatanlığının daha da artırılması ilə bağlı sistemli işlər görülür”.
[gallery columns="2" link="file" size="full" ids="210591,210593"]
Teymur Musayev cari ildə elektron sənəd dövriyyəsinə keçid, səhiyyə sistemində rəqəmsallaşdırma və innovativ texnologiyalarının daha geniş tətbiqi, işğaldan azad edilən ərazilərdə səhiyyə ocaqlarının inşası və digər istiqamətlərdə mühüm işlərin görüldüyünü bildirib: “Azərbaycan Respublikası Nazirlər Kabinetinin 14 aprel 2023-cü il tarixli Sərəncamına əsasən, ölkədə səhiyyə sahəsinin rəqəmsallaşdırılması çərçivəsində önəmli yeniliklərdən olan Elektron Resept Sistemi Səhiyyə Nazirliyi tərəfindən 1 may 2024-cü il tarixindən etibarən istifadəyə verilib”.
Prezident İlham Əliyevin müvafiq Fərmanı ilə Səhiyyə Nazirliyinin tabeliyində Respublika Qan Bankının yaradıldığını qeyd edən nazir deyib: “Dövlət başçısının imzaladığı sənədin icrası məqsədilə Respublika Qan Bankının Bakı şəhəri ilə yanaşı, ölkənin digər bölgələrində də fəaliyyətinin genişləndirilməsi prioritet məsələrdəndir. Dövlət başçısının digər Fərmanı ilə 2023-cü ilin yanvar ayının 1-dən etibarən 9 Elmi-Tədqiqat İnstitutu və Mərkəzi Səhiyyə Nazirliyin tabeliyinə verilib. Bu müddət ərzində qurumların maliyyələşdirilməsi və optimal idarəçilik prinsiplərinin qurulması istiqamətində mühüm addımlar atılıb”.
[gallery columns="2" link="file" size="full" ids="210594,210595,210597,210599"]
Nazir, qarşıda duran vəzifələr və fəaliyyət istiqamətlərindəki çatışmazlıqlar təhlil edilərək, gələcək üçün sistemli yanaşmanın tətbiqinə imkan verən müasir idarəçilik strategiyası, əhali üçün daha əlçatan və mütərəqqi tibbi xidmətlər platformasının hazırlanmasının vacibliyini qeyd edib. Həmçinin, nazirlik tərəfindən istifadəyə verilən “Elektron Resept Sistemi”ndən daha geniş istifadənin reallaşdırılması və nazirliyin tabeliyindəki bütün qurumlarda birmənalı bu sistemə keçidlə bağlı tapşırıqlar verilib.
Daha sonra Səhiyyə Nazirliyinin tabeliyində olan K.Y.Fərəcova adına Elmi-Tədqiqat (ET) Pediatriya İnstitutunun direktoru Aynur Poluxova, akademik M.A.Topçubaşov adına Elmi Cərrahiyyə Mərkəzinin direktoru Rauf Ağayev, akademik C.M.Abdullayev adına ET Kardiologiya İnstitutunun direktoru Gülnaz Dadaşova, ET Travmatologiya və Ortopediya İnstitutunu direktoru Rüstəm Talışinski, ET Ağciyər Xəstəlikləri İnstitutunun direktoru İradə Axundova, ET Mamalıq və Ginekologiya İnstitutunun direktoru Cəmilə Qurbanova, ET Tibbi Bərpa İnstitutunun direktoru Mətanət Əfəndiyeva, V.Y.Axundov adına ET Tibbi Profilaktika İnstitutunun direktoru Adil Allahverdiyev və Milli Hematologiya və Transfuziologiya Mərkəzinin direktoru Sərdar Əsədovun hesabatları dinlənilib.
Çıxışçılar qeyd ediblər ki, 2024-cü il ərzində tibb ocaqları bir sıra yenilik və uğurlara imza atıb, habelə müəssisə daxilində əməliyyatxana və şöbələr əsaslı təmir olunub. Hesabat dövründə “Böyük Qayıdış” proqramı çərçivəsində Səhiyyə Nazirliyinin təşkilatçılığı ilə nazirliyin tabeliyindəki qurumlar tərəfindən işğaldan azad olunan ərazilərə köçürülən vətəndaşlar arasında sağlam həyat tərzinin təşviqi ilə bağlı maarifləndirici aksiyalar və müxtəlif istiqamətlərdə kompleks tibbi müayinələr keçirilib. Diqqətə çatdırılıb ki, cari ildə Heydər Əliyev Fondunun vitse-prezidenti Leyla Əliyeva Səhiyyə Nazirliyinin K.Y.Fərəcova Elmi-Tədqiqat Pediatriya, Elmi-Tədqiqat Mamalıq və Ginekologiya institutlarını ziyarət edib. Leyla Əliyeva tərəfindən hər iki tibb müəssisəsinə yüksəktezlikli süni tənəffüs cihazları, küvəzlər və digər müasir tibbi avadanlıqlar hədiyyə olunub. Heydər Əliyev Fondunun vitse-prezidenti, həmçinin nazirliyin Milli Hematologiya və Transfuziologiya Mərkəzini ziyarət edib. Leyla Əliyeva tibb ocaqlarında müalicə alan uşaqların valideynləri ilə görüşüb, tibb ocaqlarında yaradılan şəraitlə tanış olub.
Bundan əlavə, oktyabrda Şuşa şəhərində Türk Dövlətləri Təşkilatına (TDT) üzv və müşahidəçi ölkələrin səhiyyə nazirlərinin IV iclası çərçivəsində TDT-nin üzv və müşahidəçi ölkələrinin səhiyyə nazirliklərinin elmi-tədqiqat institutları və mərkəzləri arasında onkologiya, kardiologiya, oftalmologiya, pediatriya, travmatologiya və ortopediya sahələrinə aid bir sıra Anlaşma Memorandumlarının imzalanması baş tutub. Sənəd tərəflər arasında intensiv əlaqələr qurmaqla, elmi tədqiqatların aparılması, bu ixtisaslarda fəaliyyət göstərən tibb işçilərinin bilik və bacarıqlarının təkmilləşdirilməsi, kadr mübadiləsi, faydalı əməkdaşlığın təşviqi və gücləndirilməsini ehtiva edir.
Eyni zamanda, qeyd edilib ki, cari ildə I Türk Dövlətləri Kardioloji Qurultayı, ET Ağciyər Xəstəlikləri İnstitutunun 80 illik və Sümük İliyi Transplantasiyasının 10 illik yubileyinə həsr olunan beynəlxalq elmi-praktik konfrans keçirilib. Tədbirlər Səhiyyə Nazirliyinin Elmi Tibbi Şurası tərəfindən akkreditasiya olunub. Bundan əlavə, elmi-tədqiqat institutları və mərkəzlərinin mütəxəssislərinin məqalələri bir sıra tanınmış beynəlxalq nəşrlərdə dərc olunub.
Təqdimatlardan sonra nazir əldə olunan nailiyyətlərlə yanaşı, problemlərin də mövcudluğunu diqqətə çatdırıb. Teymur Musayev nazirliyin tabeliyində fəaliyyət göstərən elmi-tədqiqat institut və mərkəzlərində müasir yanaşmalara əsaslanan korporativ idarəetmə mexanizmlərinin tətbiqinin vacibliyini qeyd edib: “Biz, bütün diqqətimizi bu problemlərin həllinə yönəltməliyik. İnanıram ki, qısa müddətdə müsbət nəticə əldə olunacaq".
İclasın sonunda qurum rəhbərlərinə müvafiq tapşırıqlar verilib.
