Bəzi insanlar, müxtəlif səbəblərdən, hətta özlərindən asılı olmadan, davamlı olaraq hər yerə gecikirlər. Bunu psixoloji faktorla da əlaqələndirənlər də az deyil. Hətta bildirirlər ki, bu, əsasən insanların vacib və ya çətin işləri ertələmə vərdişidir.
Bəzi insanlar bu cür davranışları öz şəxsiyyətləri ilə əlaqələndirirlər, digərləri isə müəyyən həyat şəraiti, iş yükü və ya daxili narahatlıq səbəbi ilə gecikirlər.
Mövzu ilə bağlı İnsanoid.com-a açıqlama verən psixoloq Aytən Ələkbərlinin sözlərinə görə, gecikmək bəzi hallarda psixoloji faktor sayıla bilər:
[gallery link="file" columns="1" size="full" ids="217240"]
“Hər yerə gecikən insanda artıq narsisizmin əlamətləri var. O istəyir ki, hər kəs onu gözləsin, gələndə də üzərinə daha çox diqqət çəksin. Bu, onun özünə yaranan sevgisindən və qarşısındakı insana olan hörmətsizliyindən irəli gəlir.
İkinci gecikmə səbəbi təsadüf ola bilər. Hər insan ümumiyyətlə gedəcəyi yerə uyğun vaxtı təyin etməlidir. Məclislərə gecikən insan var ki, sırf diqqəti çəkmək istəyir. Çünki özlərini bu həyatda təsdiq edə bilməyiblər. Bu səbəbdən də sanki geyim üslubları ilə, gecikərkən “hər kəsin diqqətini cəlb edim” düşüncəsi yaranır. Həmin yaranan düşüncə də özünü yox, sadəcə geyimini təsdiq etməkdən ötrüdür. İnsan bir şəxsiyyət olaraq heç bir işdə özünü təsdiq edə bilmədiyinə görə, belə düşünür. Onlar ətrafındakılarına güvənərək öyünür. Bu fikirdə olanların təbii ki, psixoloji problemləri var. İnsan öz potensialını əldə edə bilmir və güvənmir”.
A.Ələkbərli qeyd edib ki, bu hal bəzən şəxsiyyət pozğunluğuna da gətirib çıxara bilər:
“Bəzən uğurlu insanlar da məsuliyyətsizlik səbəbindən gecikirlər. Düşünürlər ki, onsuz da mən olmadan məclis olmaz, sonda nöqtəni məhz mən qoymalıyam. Bu, insanlara qarşı olan hörmətsizlikdən irəli gəlir. Həmin insanlar yalnız özlərini düşünürlər. Bu, özünə dəyər vermək deyil. Əksinə, get-gedə özünü dəyərsiz bir vəziyyətə gətirib çıxarmaqdır. Belə vəziyyət psixoloji faktor olaraq həmin insanda şəxsiyyət pozğunluğuna gətirib çıxara bilər”.
Sosioloq Mail Yaqubov qeyd edib ki, ümumiyyətlə, hər hansı bir yerə gecikmək pis vərdişdir:
[gallery link="file" columns="1" size="full" ids="217241"]
“Bu, birmənalı olaraq qarşı tərəfə olan hörmətsizlikdir. İstər qəsdən edilsin, istərsə də həmin o şəxsin xarakterindən ibarət olan bir şey olsun. Bu artıq vərdiş halına çevrilib. Əslində qarşı tərəfə hörmətsizlik etmək istəmir. Amma nəticə olaraq hörmətsizlik ortaya çıxır.
Səbəb bir çox amillər ilə bağlı ola bilər. Ola bilsin ki, gecikmək artıq şəxsin xarakterinin bir parçasına çevrilib. Bəzi seçimlər var ki, onun məntiqi yoxdur. Sadəcə gecikmə kimi pis vərdiş adi hala çevrilib. Mütləq şəkildə qarşısı alınmalıdır”.
“Gecikmə özündən razılıqdan da yarana bilər. Şəxs özünü çox üstün tuta bilər. Qarşı tərəfə dəyər vermir. Qarşısındakı insanın zamanı onun üçün maraqlı deyil. Yalnız özünü düşünür. Bu lap dəhşətlidir. Təəssüf ki, bəzi insanlarda belədir. Cəmiyyətdə elə ziyalı və savadlı insanlar var ki, görüş vaxtı təyin etsələr də, ümumiyyətlə həmin görüşə gəlmirlər. Bu artıq faciədir. Belə insanlar cəmiyyətdə xoş qarşılanmırlar. Onlarla görüşmək istəyənlər də artıq növbəti dəfə qarşılaşmağa, üz-üzə gəlməyə can atmırlar. İş mühitində də belədir. Qeyri -dəqiq və məsuliyyətsiz adamla işləmək çox çətindir”.
Nəzrin Vahid
