Polis qanunsuz ov edənləri saxlamaq üçün havaya atəş açıb, odlu silah və qaban müsadirə edilib. Bu barədə 29 oktyabr tarixində Daxili İşlər Nazirliyi İnsanoid-ə məlumat verib.
Belə ki, “Ağgöl” qoruğu istiqamətindən torpaq yolla hərəkət edən “Niva” markalı avtomobil polis əməkdaşı tərəfindən saxlanılıb. Avtomobilin içərisində olan iki şəxsin əlində odlu silahın olduğunu görən polis əməkdaşları onlardan avtomobildən enmələrini tələb etdikdə onlar tabesizlik göstərib, qaçmağa çalışıblar. Bu zaman polis əməkdaşı havaya bir dəfə xəbərdarlıq atəşi açıb. Bundan sonra həmin şəxslər saxlanılıblar.
Onlardan 2 ədəd odlu silah və qanunsuz ovladıqları 1 ədəd qaban götürülüb.
Polis şöbəsinə gətirilən həmin şəxslərin Ağcabədi rayon sakinləri Arzuman Mamedov, Anar Quliyev və Aqil Yusifov olmaları müəyyən olunub.
Faktla bağlı araşdırma aparılır.
