Məktəb illərində proqramçılığı öyrənir, bu istiqamətdə beynəlxalq yarışlara qatılır. 11-ci sinifdə artıq bu sahədə yaxşı iş təklifi də alır. Orta məktəbi bitirən kimi iş həyatına başlaya bilərdi. Lakin onun planları xaricdə təhsil almaq və xarici təcrübəni öyrənmək olur. Bu səbəbdən, orta məktəbi bitirəndən sonra, 13 avqust 2008-ci ildə, doğum günündə ABŞ-yə gedir. Söhbət 16 ildir ABŞ-də yaşayan azərbaycanlı Əkrəm Nəbiyevdən gedir.
O, ABŞ-də neft şirkətlərində qazma və quyu mühəndisi olaraq çalışıb. Hazırda ABŞ-də İsveçrənin "Transocean" şirkətində fəaliyyət göstərir. Paraleldə isə öz biznesini qurub, zamanla investisiya sahəsinə yönəlib.
Valyuta.az-ın qonağı olan Ə.Nəbiyev karyerası ilə bağlı sualları cavablandırıb.
O bildirib ki, ABŞ-də Luiziana Dövlət Universitetində təhsil alıb və buraya təqaüdlə qəbul olunub:
Ə.Nəbiyevin sözlərinə görə, o, universitetdə təhsil aldığı dövrdə artıq 4 mağaza sahibi olub:
“Tələbə vaxtı davamlı işləmişəm. Gündüzlər dərs oxuyurdum, axşamlar işləyirdim. Tələbə olduğum müddətdə artıq mağaza sayımız 4-ə çatmışdı”.
O qeyd edib ki, tələbəlik illərində neft şirkətində çalışaraq təcrübə qazanıb, həmçinin biznesini inkişaf etdirib. Lakin biznesdən uzaqlaşmayıb, amma neft sektoruna daha çox fokuslanaraq, müxtəlif sahələrə yatırım etməyə başlayıb. Əkrəm, Uorren Baffet kimi investorların izlədiyi yolu seçib və daşınmaz əmlakla yanaşı birjalara da investisiya edib. İlk yatırım təcrübəsi uğursuz olub:
“Universitetdəki tələbə yoldaşlarımla bir yerdə bir yatırım edib qazma quyuların hissəsini aldıq. 200 min dollar yatırdıq, biznes batdı. Əziyyətlə qazandığımız pul batdı. O vaxt həmin pulu birjalara yatırsaydım, indi bir neçə dəfə artım olardı, amma o riski etmək istədik”.
Əkrəmin neft sektoru ilə bağlı 4 elmi məqaləsi var və Meksikada qazma sahəsində uğurlar əldə edib. Əkrəm gələcəkdə Azərbaycana qayıtmaq haqqında düşündüyünü deyib:
“Xaricdə təhsil almaq, işləmək insana fərqli təcrübə qazandırır. Bəli, bütün gənclərə xarici ölkənin təhsilini, təcrübəsini öyrənməyi məsləhət görürəm. “Çox gəzən çox bilər”ə inanıram. Ölkəmizi çox sevirəm. Azərbaycansız yaşaya bilmərəm. Tez-tez gəlməyə çalışıram. Qayıda bilərəm. Hər şeyi zaman göstərəcək”.
[gallery link="file" columns="2" size="full" ids="214281,214282,214284,214283"]
