Bu gün Azərbaycan Respublikasının Milli Qəhrəmanı, jurnalist, "Molodyoj Azerbaydjana" qəzetinin müxbiri olmuş Salatın Əsgərovanın doğum günüdür.
İnsanoid.com xəbər verir ki, Salatın Əziz qızı Əsgərova 16 dekabr 1961-ci ildə Bakı şəhərində ziyalı ailəsində anadan olub.
Əsgərova 1979-cu ildə Bakı şəhəri Mikayıl Müşfiq adına 18 saylı orta məktəbi bitirib, həmin il indiki ADNSU-ya daxil olub. O, mühəndislik fakültəsini bitirib, lakin jurnalist kimi fəaliyyət göstərməyə başlayıb.
Salatın 1984-cü ildə müqavilə ilə “Bakı” qəzetində, 1988-ci ildə isə “Azərbaycan gəncləri” qəzetində jurnalist işləyib. O, Birinci Qarabağ müharibəsinin ilk günlərindən hərbi mövzuda məqalələr yazıb və tez-tez cəbhənin qaynar nöqtələrində olub.
9 yanvar 1991-ci ildə Əsgərova Laçından Şuşaya yollanarkən, onun olduğu maşın indiki Salatınkənd yaxınlığında ermənilər tərəfindən atəşə tutulub. Qətlindən bir neçə gün sonra o, Bakıya gətirilərək Şəhidlər xiyabanında dəfn olunub.
1992-ci ildə Əsgərova “Azərbaycanın Milli Qəhrəmanı” adına layiq görülüb və bu adı alan ilk qadın jurnalist olub. Bakı şəhərində küçə, həmçinin Bakı buxtasındakı gəzinti katerlərindən biri onun adını daşıyır.
